3444/2023-2024

Dated Siaha 23rd January 2024: Vawiin chawhma khan DRDO Conference Hall, Siahaah 'Annual Training On Civil Registration System for Registrar of Births and Death 2024' neih a ni a, Pi Lalnunmawii, Addl.DC chuan khuallian niin a hmanpui.

Pi Lalnunmawii chuan Siaha District chhunga Registrar of Births and Deaths (RBD) -te chuan hna pawimawh tak an thawk a, khawtlang leh ram tana an pawimawhna chu inhre thar fo turin a chah a. Ram changkang apiangah naupiang leh mitthi an chhinchhiah fel thin tih tarlangin kan ram ngeiah pawh hetiang tihdan felfai tak zawm zel hi a tul takzet a ni, a ti. Piang leh thi chungchang chhinchhiahna felfai tak awm turin Registrar of Births and Deaths (RBD) te chu mahni awmna khua theuhah taima leh rim zawka thawk zel turin a chah a ni.

Khuallian chuan Birth Certificate- chu kawng engkimah phut zel a nih tawh thu tarlangin, a pekchhuah kawngah chhuanlam hote hmanga lo tihkhawtlai a awm thei tiin mite tan harsatna siamtu ni lo a, midangte tanpuitu nizawk tur leh a hma lam zela Birth Certificate- a mamawhtute hnena pechhuak thin turin a chah a. A taka ram hmasawnna hnathawk turin statistics felfai tak awm a tul tih sawiin Pi Lalnunmawii chuan piang leh thi zat data dik tak vawng turin RBD- te a chah a. Mipuite dinhmun leh mamawhna hrethiam tak chunga hnathawk tur leh biak nuam, dawr nuam, mipui tana rawngbawltu ni chhunzawm zel turin kalkhawmte chu a sawm bawk.

Vawiin training- hi Pu Sanglura Chawngthu, MPE & SS, Addl. District Registrar of Births and Deaths chuan a kaihruai a. Pu A. Vanlalhluta, SIS i/c RBD leh Pu Gospel Chozah, DPA, DRO Office Siaha te chuan training pekna an nei a, Pu C. Vanlalbuatsaiha, SIS DRO Office chuan lawmthu sawina neiin training a khar.