HBCSE-TIFR, Pachhunga University College leh SCERT ten an huaihawt, nithum awh tur Mathematics Olympiad Camp chu vawiinah tan a ni a, a hawnna PUC Seminar Hall-a neihah Pu Joseph Lalhimpuia, Parliamentary Secretary chu khuallian a ni.
Pu Joseph Lalhimpuia chuan Mizoten subject harsa a kan ngaih, “Ui sa ei thluakin a pha lo” kan tih thin Mathematics chu tunah chuan kan thiam chho ve telh telh a ni a ti a, Mathematics thiam tam tak zofate zingah an awm ta hi a lawmawm a tih thu sawiin tan la sauh sauh turin zirlaite a fuih a, Mathematics thiam tur chuan discipline tha tak neih a ngai a, taihmakna nena thluak hmang che tham a zir a ngai a ni a ti. Anhnah tel kan lei atanga thlaa in kah kai na tur thlengin Mathematics tel lovin a tih theih loh a, sawrkar pawhin a pawimawh zia hriain Education Minister thahnemngaihna a zarah High School-ah Mathematics Teachers post a hrana a awm theih nan RR tun hnai lawkah a siam tha a ni a ti. Tun hnaiah Life Science aimaha Physical Science zir Mizo te zingah an tam chho ta nia a lan thu sawiin hei hi thil chhinchhiah tlak tak a ni a ti a. Mathematics Awareness pawh sikulah neih chhoh nise tha a tih thu a sawi bawk. Vaphai tlangval Ramdinmawia Foreign-a Mathematics PhD nei thei leh Post Doctoral ti mek chu chhuanawm a tih thu sawiin hei hi Mizo zirlaite tana chona nasa tak a ni tiin kan zir phawt chuan Ui sa ei thluak hian a pha tih amah atang pawh hian a lang chiang hle a ni a ti.
Dr L.P. Lalduhawma, he camp coordinator chuan report pein Mathematics Olympiad hi khawvel huapa Mathematics inelna a nih thu a sawi a. Prof M.B. Rege, North East coordinator leh Dr P. De, Reader, Tata Institute of Fundamental Research te an lo tel thei chu lawmawm a tih thu sawiin he inelna sang takah Mizote hming a lan theihnan he camp hi a tangkai ngei a beisei thu a sawi bawk.
He Camp hawnna inkhawm hi Pi Malsawmthangi, Director SCERT in a kaihhruai a, Pu L.Thangmawia, Head, Mathematics Department PUC chuan inlawmna thu sawiin Dr. P.DE pawhin Olympiad chungchang a sawi bawk a ni. He camp hian December 18 thleng a awh ang.
