Nimin khan NLUP Implementing Board Chairman Pu R.Selthuama chuan Thingsul, Thingsul Tlangnuam, Seling leh Tlungvel te tlawhin AH & Vety leh Industry Department hnuaia NLUP Beneficiary te hmalakna a hmunah a en.

Vawk pul hri avangin Thingsul leh a chhehvel khuaa NLUP Beneficiary te pawhin an tuar a. A bikin NLUP hnuaia private Piglet Multiplication Centre (PMC) ten vawk note an chan hnem phah hle a ni. Beneficiary te zingah Thingsulthliah a PMC neitu Pu Lalremruata, Aizawl District-a NLUP Best Beneficiary Award lawmman pahnihna dawngtu chuan vawk note 39 leh a puitling pali a hralh atangin Rs. 2,15,500 a lei chhuak tawh a. Tlungvel-a PMC neitu dang Pu L.B.Patea pawhin vawk note 96 a hralh atangin Rs. 3,36,000 a lei tawh bawk a ni. Beneficiary titha berte zinga mi, hmeithai Pi Thankungi, Seling chuan ar note 130 leh a puitling hralh theih rual 50 vel a vulh mek a. NLUP a dawn tirh atangin Pi Thankungi hian chatlak lovin ar hi a vulh a, thla thum danah zel tiralin a note a lakbelh thin a, hna dang thawk tawh lovin ar vulhin a in chawm a ni. Industries Department hnuaia Automobile Workshop, Carpentry, Tailoring leh Petty Trade thlangtu beneficiary te pawh Pu Sela chuan tlawhin anmahni kawmna a nei nghal bawk a ni.

Beneficiary te hmalakna a en hnu hian Pu Sela chuan Seling V/C House-ah Industries Department hnuaia NLUP Phase II tanpuina 1st Installment semna hun a hmanpui nghal a. Thingsul-ah mi 16, Seling ah mi 39, Thingsul Tlangnuam ah mi 6 leh Sesawng atangin mi 11, an vaiin beneficiary 72 hnenah Rs. 14,27,400 semchhuah a ni. Pu Sela hi Pu J.Hmingthanmawia, Addl. D.C., Aizawl bakah AH & Vety., Industries Department leh NLUP Media Cell Official ten an tawiawm a ni.