Vawiin chawhma dar 11.00 khan State Disaster Response Force (SDRF) mi 60-te chuan 5th Bn I.R. Headquarters, Sakawrtuichhun-ah passing out parade an nei a; he hun hi Parliamentary Secretary Pu Lalrinmawia Ralte chuan khuallian niin a hmanpui a; Pu P.C. Lallawmsanga IPS, Principal Secretary chu khual-zahawm a ni.
Pu Lalrinmawia Ralte chuan SDRF training chhuakte fuihna thu sawiin, “Mizoram hi chhiatna lian tham tawk thei dinhmunah kan ding a; hetiang rikrum thila chhanchhuahna hna thawk tur hian a zira zir chhuak kan mamawh em a; chutiang mite chherchhuak tura Disaster Management & Rehabilitation Dept. in ruahmanna a siam thin hi a lawmawmin, a thlamuanthlak a ni” a ti. Parliamentary Secretary chuan chhiatna chi hrang hrangin min den laia awm dan tur leh chhanchhuah hna thawh dan turte zau zawka Mizoram mipuite inhrilh hriat tul a tih thu sawiin, “Lirnghin duhna ramah chuan school naupangte thlengin awm dan tur leh insaseng dan tur te zirtir an ni a; hetianga inzirtirna leh training hian mihring nunna tam tak a humhim thei a ni” a ti a. SDRF tura training chhuakte chu an thiamna leh hriatnate an kalna apiangah mi dangte hrilh a, zirtir chhawng turin a fuih a ni.
State Disaster Response Force (SDRF) te hi chhiatna a lo thlena chhanchhuah hna thawk thei turin kawng chi hrang hrangin training pek an ni a; anmahni zirtir tur hian 2nd Bn. National Disaster Response Force (NDRF), Kolkatta atangin sipai pahnih an lokal a ni. Vawiina training chhuakte hi 7th batch an ni a; an vaiin sipai 60 - 4th leh 5th IR Bn. sipai 30 ve ve an ni. Hemi hma hian SDRF atan training vawi 6 buatsaih a lo ni tawh a, chutah chuan 1st, 2nd, 3rd Bn. MAP sipaite training pek an ni. Tunah hian Mizoram chuan SDRF sipai 360 a nei ve ta a; training pe thei turin Master Trainer mi 8 te chuan North East Police Academy atangin training an zo tawh bawk.
Vawiina passingout parade inkhawm hi Pu C. Lalpeksanga, Director, DM &R chuan a kaihruai a; training chhuakte hnenah hian Parliamentary Secretary Pu lalrinmawia Ralte chuan Certificate a hlan a; a titha zualte hnenah Merit Award a hlan bawk. Pi Rita K. Pachuau, Deputy Director, DM&R chuan lawmthu sawiin inkhawm a khar a ni.
