Vawiin khan Lunglei Circuit House Conference Hall-ah NLUP Implementing Board (NIB) Chairman Pu JH Rothuama hovin Lunglei District NLUP Committee an thukhawm a. He meeting hi Lunglei DC Pu Ashish Madhaorao More-in a kaihruai a, NIB Chairman tawiawmtu NIB Secretary Pu James Lalrinchhana, NLUP Chief Media Officer Pu David L.Thangliana bakah NLUP District Co-ordinator Pu Zathangliana, NLUP Line Department hotu te, DIPRO Lunglei Pi Mina Zoliani, MJA Lunglei President Pu K. Lalrinpuia leh MJA member dangten meeting-ah hian Lunglei District huamchhunga NLUP hnuaia hmalakna hrang hrang an thlirho a ni.

Meeting kaihruaitu Lunglei DC Pu Ashish More chuan NIB Chairman Pu JH Rothuama’n amah ngeiin Lunglei District tlawhin NLUP hmalakna hrang hrang en tura a kal chu lawmthu a hrilh a. NLUP pawimawhna hre thar leh theuh tura chahin Lunglei DC chuan NLUP chu mirethei ber leh chhumchhia te thleng phak programme a nih avangin Line Department zawng zawngten theihtawp chhuah turin a chah a. Lunglei District-ah Oil Palm nasa taka chin a nih takah chuan Oil Palm Mill pawh din theih nan sorkarin hmalakna nei se a duh thu te, Agriculture leh Horticulture hnuaia beneficiary te hnenah thlai chi pek thin te chu quality tha a nih ngei theih nan en uluk ni se tih leh Line Department ten harsatna an tawhin DC/NLUP Nodal officer a nihna angin a hnenah thlen vat turin a hrilh nghal bawk a ni.

NIB Chairman Pu JH Rothuama chuan Line Department aiawhte kim taka meeting-ah an rawn lang theih chu a lawmawm a tih thu a sawi a; Lunglei District-ah NLUP hmalakna hrang hrangah hlawhtlinna hmuh chhoh zel a nih avangin a lawmawm hle a ni, a ti bawk. NLUP 3rd & 4th Phase tanpuina sem hnaih a nih dawn avangin Line Department zawng zawngte lo inring tur leh District dangte entawn tlak khawpin hnathawk turin a chah a. Sorkar pawhin theihtawp chhuah zelin, thlai tharsa phurh chhuah theihna tur link road siam belh hna pawh thawh tum mek a ni a, NLUP tanpuina dawngte zingah thawk tha lo chu pek zawm an nih loh tur thu a sawi bawk.

NIB Secretary Pu James Lalrinchhana pawhin thu sawiin Lunglei District huamchhunga NLUP kalpui dan chu a lungawi thlak thawkhata an hriat thu a sawi a. NLUP hnuaia Trade thlak rawn dilte zinga tanpuina sum zaa 30% dawng tawhte erawh chu thlak phal sak lo turin rel a ni tih a sawi.

Vawiin meeting-ah hian Line Department 8 - Agriculture, AH&Vety, Horticulture, Industries, Environment & Forests, Sericulture, Soil & Water Conservation leh Fisheries - te an kal kim vek a, an hmalakna leh hlawhtlinna an hmuh ang angte an tarlang theuh a ni. Line Department te chuan NIB Chairman hnenah an harsatna tawhte an thlen theuh a, a bik takin an hnathawhna hmunte a kilkhawrin motor indaihlohna avangin duh angin NLUP hmalaknate chu a hmunah enfiahin an vil ngun theih loh thu an sawi bawk.

Vawiin vek khan NIB Chairman Pu JH Rothuama chuan Lunglei-a chanchinthar thehdarhtute a kawm nghal a, NLUP hmalakna chu theihtawpa thlawp leh tawiawm zel turin a ngen a ni. NLUP District Coordinator hovin Lunglei District huamchhunga NLUP hmalakna hrang hrang a hmunah tlawh ho leh thawkthate chanchin phochhuah dan turte an rel a ni.

NIB Chairman Pu Rothuama leh amah tawimawmtu officials te hian niminah Aizawl atanga Lunglei panin, kalkawngah pawh NLUP hnuaia hmalakna heng hmun hrang hrang - Kanghmun, Sekhum, Ramlaitui, Mualthuam, Haulawng leh Mausen-ah te an tlawh phei nghal a. Vawiin khan Pu J.Lalnuntluanga, Salem Veng DTP Trade hlawhtlinpuitu leh Autorickshaw beneficiaries te NIB Chairman chuan a kawm bawk a ni.