Nimin khan Parliamentary Secretary leh Champhai North Bialtu MLA ni bawk Pu T.T. Zothansanga chuan Champhai Hmunhmeltha-ah JNNURM hnuaia Integrated Housing & Slum Development Project kaltlanga Community Centre building, cheng nuai 31 seng a sak chu a hawng.

Parliamentary Secretary Pu T.T. Zothansanga chuan hall hawn thar chu khawchhung mipuiten tangkai taka an hman a, mimal ta anga an cheibawl a, an enkawl zel a beisei thu a sawi a. Khawpuiin hma a sawn a, a than zel rualin sorkar pisa leh building mamawh dang awmna tur zawn a ngaih thin thu leh, chutiang hunah chuan khaw mipuiten an tan hmasawnna tur a ni tih hria a, duhawmna tel lovin ui lova an ram te sorkar an pek ngam a tul thu a sawi a. Hmasawnna thleng tur chuan mipui pawh kan lo inkau ve a ngai a ni, a ti.

Pu T.T. Zothansanga chuan ram tihhmasawn nan hnathawh chi hrang hrang rawn lut thin te chu hnathawktu thenkhatten hlep tam an duh lutuk thin avangin hna a tichhe hle a ni tiin, he kan hri tha lo tak hi kan paihbo a tul hle a ni, a ti a. Khaw neitute pawh an khua hmasawnna atana hnathawh awm reng reng uluk taka lo enpui turin leh, sorkar duhsakna dawngsawng thiam turin Parliamentary Secretary chuan a chah a ni.

Hall thar hawnna inkhawm kaihhruaitu UD&PA Deputy Director (Town Planning) Pu Ralthuama Ralte chuan mipui intawh khawmna tur ramro tling Hall thar Hmunhmeltha a sak a ni chu lawmawm a tih thu leh mipuiten tangkai taka an chhawr chhunzawmna turin duhsakna a hlan a. He huna thusawitu dang Hmunhmeltha VCP Pu Chawngdailova chuan Hmunhmeltha khawtlangin a mawmawh, mipui intawhkhawmna tur building thar tha tak an neih vanga lawmthu a sawi bawk.

He Community Centre building sak chungchangah hian UD&PA Assistant Engineer Pu Laldinsanga Hnamte chuan report a pe a. Hall lenzawng hi a dung feet 65, a vang feet 30 leh a sanzawng feet 20 niin,  inthiarna pahnih leh inthlakna (Green Room) bakah tuizem litre 10,000 dawngthei siam a ni.