Ministry of Rural Development, Government of India hnuaia thingtlang mite chawikanna tura hmalakna hrang hrangte thlirin vawiin nileng khan Aizawl District Level Vigilance & Monitoring Committee chu Chairman Pu C.L.Ruala, M.P. (Lok Sabha) leh Co-Chairman Pu Ronald Sapa Tlau, M.P. (Rajya Sabha) te hovin DRDA Conference Hall, New Secretariat Complex, Khatla ah an thukhawm.

Chairman Pu C.L.Ruala chuan member thar Pu Ronald Sapa Tlau lawmna thu sawiin thingtlang mipui te tihhmasawnna tura hmalakna te kaihhruaina chu tlema tihdanglam zeuh zeuh niin vil tur thar a awm nual dan te a sawi lang a, Vigilance & Monitoring Committee member te chuan an mawhphurhna pawimawh zia hriaa taima tak leh thahnemngai taka thawk chhunzawm zel turin a sawm. Co-Chairman Pu Ronald Sapa Tlau chuan state dangte anga hmasawn zel nih kan tum chuan kal dan ngai zui reng lova a tul leh remchan anga inher rem a pawimawh thu te a sawi a. Vigilance & Monitoring Committee member te chu ram hmasawnna an kovah thui tak a innghat a ni tih hriaa thahnemngai taka mipui tan thawk thin turin a chah.

District Level Vigilance & Monitoring Committee ah hian meeting kalta thurel bawhzui dan te an thlirlet a, inthlanpui neih avanga meeting neih a remchan loh avangin kum 2013-2014 chhunga hmalak dan leh June 2014 leh September 2014 quarter ending thlenga hnathawh dan te an thlir ho nghal bawk. Kum 2013-2014 chhung khan MGNREGA hnuaiah sum hmuh Rs 3805.81 lakhs atangin Rs 3805.35 lakhs sen a ni a, job card 24220 pekchhuah niin tha 20,43,000 tan inhlawhna siam a ni bawk. Chawhrualin ni 80 inhlawhna pek an ni. Mi rethei chenna in sak sakna Indira Awaas Yojana (IAY) hnuaiah kum 2013-2014 chhung khan sum Rs 368.645 lakhs hmuh atangin Rs 368.545 lakhs sen a ni a, in 472 sak zawh a ni. Kum 2014-2015 chhunga IAY hnuaia hmalakna turin Sorkar Laipui atangin Rs 55.106 lakhs dawn ani tawh a, mi pakhat tana Rs 75,000 /- zel senga thawhna turin bawhzui chhoh mek a ni. Pradhan Mantri Gram Sadak Yojana (PMGSY) hnuaiah Project 45 sanction tawh zingah 38 thawh zawh a ni tawh bawk. Nirmal Bharat Abhiyan (NBA) hnuaiah kum 2013-2014 chhung khan inthiarna 1158 sak a ni a, kumin 2014-2015 chhung hian 461 sak a ni tawh bawk. Heng bakah hian Integrated Watershed Management Programme (IWMP), National Land Records Modernization Programme (NLRMP), National Rural Drinking Water Programme (NRDWP), National Social Assistance Programme (NSAP), Establishment of Ashram School & Construction of Hostels leh Ragiv Gandhi Gram Vidyatikaran (RGGVY) hnuaia hmalakna te an sawiho bawk a ni.

Meeting ah hian Minister Food Civil Supplies & Consumer Affairs Pu John Rotluangliana, Parliamentary Secretary Pu K.S. Thanga, Govt. Deputy Chief Whip Pu R.L.Pianmawia MLA leh Er. Lalrinawma, MLA te pawh telin thingtlang mipuite chawikan nana hmalakna hrang hrang kalpui danah an ngaihpawimawh zawngte sawiin rawtna te an siam bawk a ni.