Vawiin khan Lawngtlai DC Conference Hall ah RTI Week 2014 hmanna hun neih a ni a, Addl. DC Pu R. Lalsangluaia, chu khuallian niin RTI chung chang zir hona neih a ni.

Khuallian chuan Right To Information Act 2005 hi ram inrelbawlna tha kan neih na tura dan pawimawh ber te zing a mi a ni a, ti a. A chhawr tangkaitu khua leh tui te tan leh sawrkar hnathawk te tan ram tana rawngbawlna remchang tak min chhawp chhuah sak ve ve a ni, a ti a. RTI Week hmang tura lo kal khawm te chu taima tak leh chik taka RTI zirchiang turin a fuih a ni.

He hunah hian Pu H. Zonunmawia, MCS, Sub Deputy Commissioner Lawngtlai chu Resource Person niin RTI chung chang zirtirna (Power Point Presentation) a nei a, a ni hian RTI hmanga zawhna zawt tute chanvo te, a lo chhang tu Department SPIO leh SAPIO te tih tur bakah thu buai hla buai a lo awm a Information Commission a zualko dan leh kalpui dan te chipchiar takin a zirtir a ni. Hemi hnu hian kal khawmte zing atangin hriat belh duh nei leh harsatna nei te tan zawhna hun leh sawihona neih a ni a, kalkhawm ten hlawk takin he hun hi an hmang a ni.

Vawiin a RTI week 2014 hi Pu K. Saitluanga, MIS, DIPRO in kaihruaiin Lawngtlai Khawpui huamchhunga Department zawng zawng aiawh, LADC aiawh, VC zawng zawng aiawh, YLA Branch tin aiawh bakah CYLA, LWA, LSA, MUP, MHIP leh Government Lawngtlai College zirlai naupang te an tel a. Pu Vanlalhmachhuana, MCS, SDC chuan kalkhawm te chungah lawmthu sawina nei in refreshment tuihnai tak ei ho a ni bawk.