Vawiin chawhma khan Chief Minister Pu Lal Thanhawla chuan cheng nuai 1068.75 senga sak Champhai District Hospital building thar chu a hawng. He hunah hian Health Minister Pu Lal Thanzara chu Khualzahawm niin, Chief Minister nupui, Indian Society on Tobacco and Health (Mizoram Chapter) President Pi Lal Riliani, Sports Minister Pu Zodintluanga leh Parliamentary Secretary Pu T.T. Zothansanga-te an tel bawk a ni.

Chief Minister chuan Hospital hawnna inkhawmah hian hospital hnathawkte leh a khaw mipuite chuan neitu nihna rilru pu a, thinghlim taka an enkawl zui a beisei thu a sawi a. Mihring cheng zat tlemte si ah hian Mizo zingah cancer leh natna hrang hrang vei kan tam hle a ni tiin, mipuiten hriselna kan ngaih pawimawh a, kan ei leh in uluk nachang hriat a, zuk leh hmuam lamah insum nachang kan hriat thar mai bakah thianghlimna kan ngaih pawimawh a pawimawh a ni, Chief Minister chuan a ti a. Chutihrual chuan Doctor-te pawhin an enkawl mipuite chu thahnemngai taka lainatna nen, an hriatthiam theih tura damdawi chawh kawngah te pawh chipchiar taka hrilh thin turin a fuih a. India ram chhunga hriselna kawnga state entawntlak kan nih theih a beisei thu a sawi a ni.

Ram hmasawnna atan a chhunga chengten sum aiin dikna kan ngaihpawimawh a tul thu Chief Minister chuan a tarlang a. Ramin mamawh kan neih tam em em laiin thawhchhuah kan nei tlem si a, chhiah pek lamah tan lak a, sorkara thawh tam hnam nih chu kan inelna ni tawh zawk se tiin, hemi lam hawi hian sorkar pawhin ngaihtuahna a seng a ni, a ti a. Dik leh dik inlawm tawn a, thatna nen ram siamtha turin Chief Minister chuan mipuite a sawm a ni.

Health Minister Pu Lal Thanzara chuan term hmasa lama Health Minister hmalakna avanga Hospital changtlung tak hawn a ni ta chu lawmawm a tih thu a sawi a. Hriselna lamah Sorkarin hma a lak zel thu sawiin, doctor leh nurse engemawzat lak an nih tawh thu leh lak belh tura ruahmanna siam a nih tawh thu a sawi a. Doctor leh nurse-ten indaihlo chung chunga tlawmngaih chhuaha damlo an lo enkawl tawh thinna chungah lawmthu a sawi bawk a. Hospital-a hnathawktu leh hmanrua lama mamawhna a awm chuan Sorkarin phuhruk a tum zel thu a sawi bawk.

He hunah hian bialtu MLA leh Parliamentary Secretary ni bawk Pu T.T. Zothansanga pawhin Champhai mipuite tana tangkai tak tur hospital building thar an neih chungah lawmthu a sawi bawk a ni.

Hospital thar hawnna inkhawm hi Dr. K. Ropari, Principal Director, Health & Family Welfare chuan kaihruaiin, Er. Vanlalzuala Chenkual, Sr. EE, Health & Family Welfare Department chuan Hospital building thar sak chungchang report a pe a. Building hi feet 59121.21 biala sak niin, Tantia Construction Limited in a sak hna a thawk a, kum 2013 December khan sak zawh a ni.

Hun hi Dr. Lalbiakkima, Director, Hospital & Medical Education chuan lawmthu sawiin a khar a. Hawnna inkhawm neih zawh hian Khuallian ho hian Hospital thar hi chipchiar taka fanchhuah a ni.