NLUP Implementing Board (NIB) leh Govt Aizawl College, Department of History, bultumin vawiin khan Synod Conference Centre-ah leilung, ramngaw leh nungchate humhalh chungchanga tihtur pawimawhte inhrilhhriatna leh inzirtirna hun Environment Awareness Campaign hman a ni.
He Environment Awareness Campaign ah hian NIB Vice Chairman Pu PL Thanga IAS (Rtd) chu khuallian a ni a, he hun chhim tura kalkhawm zirlai leh zirtirtu te hmaah hian Mizoram leilung humhalh a tul zia leh NLUP pawhin a tum ber anih thu a sawi a ni. New Land Use Policy (NLUP) hian mipuite hnena chhawmdawlna pek bakah leilung humhalh hi a tum pawimawh ber pakhat a ni a ti a. Mizoram leilung humhalhna ah hian tunhma atanga kan pi leh puten an lo tih dan chu zirchian a, mi thahnemngaite nena thawhho tlan a ngai a ni tiin zirlaite chu kan hnam zungah kir leh ang u (Let's go back to our roots) tiin a sawm a ni. NLUP kalphung te sawifiahin Pu PL Thanga chuan NLUP hnuaiah kan ram leilung tichhe lo zawnga hmalak hi sawrkar pawhin a tum ber a ni a ti a, ram hmasawnna tura hnathawhna kal mek ah hian ramchhung a chneg mipuite kan hmaih thei lo a ni tiin mipuite ngaihpawimawh an nih thu a sawi a, NLUP chuan hun rei tak daih tur hmasawnna hi a ngaipawimawh a ni a ti bawk.
Environment Awareness Campaign ah hian sawihona hun hman niin Pu K.Lalhruaia, Asst Professor, Govt. Aizawl College-in khuhhawnna a nei a, hmasawnna kal mek zela leilung tih chhiat mek a nih thu sawiin hmasawnna kalmekin kan ram leilung te a tihchhiat belh lohna tura tan lak a tul thu a sawi a ni. Zirlaite nen hian sawihona hun hman chhunzawm niin chawhnu lamah Central YMA President Pu Lalbiakzualan thu a sawi a ni.
Environment Awareness Campaign hi Pi Kailianchhungi, Head of Department, Department of History, Govt. Aizawl College-in a kaihhruai a, Govt. Aizawl College Principal Pu Lalrinawma’n kalkhawm te lawmna thu a sawi bawk.
