Mizoram sawrkar Flagship Programme NLUP kalpui mek endik hna thawk turin nimin khan NLUP Implementing Board leh NABARD Consultancy Services Pvt Ltd (NABCONS) chuan NLUP Conference Hall-ah thawhhona thuthlung an ziak.

Endik hna (3rd Party Monitoring) thawk tur hian Planning leh Finance Minister H. Liansailova, NLUP Nodal Minister nibawk hriatpuiin NABCONS aiawh Regional Manager RK Das leh NLUP aiawh in Secretary Zorammuana ten inremna hi an ziak a, NABCONS te hian vawiin atangin NLUP Office hmun remchangah an thawk tan nghal dawn a ni.

Cabinet Comittee on Economic Affairs (CCEA) ten NLUP Project atan cheng vaibelchhia 2,873 leh nuai 13 a pawm ruala a hlawhtlinna enpui tura 3rd Party Monitoring tel tura tih anih angin, hemi atan hian a hma in cheng nuai 95 a thawk turin DJRC Ltd chu inrem ziah pui a ni tawh a, hemi hnu hian an hnathawh dan phung chu NLUP thuneitute beisei ang an phak loh avang leh hemi hnu hian an tih tura beisei thil chi hrang hrangah ti lova an inhnuhdawh zui tak avangin a chhang hniam ber dawttu NABCONS chu cheng vaibelchhe 1.15 a he endik hna thawk zui tur hian thawhpui tura thlan a ni ta a ni.

Inremna thuthlung ziahna ah hian NABCONS te hnathawh tur chi hrang tarlan nghal a ni a, hetah hian Line Department aiawh te pawh telin, NABCONS te thil hriat duh pawimawh leh NLUP kaihhnawih Data pawimawh te chu kumin Krismas hmaa pe hman tura tih an ni a, NABCONS ten hna an tan nghal theihna turin 1st instalment cheng nuai 11.5 chu pek chhuah nghal a ni.