Nimin chawhnu dar 1 khan NLUP Conference Hall-ah January 14, 2013 a Kut Hnathawk tha thlangtu tur Committee leh Pu Lal Thanhawla, Chief Minister chuan kalphung tur sawihona hun an hmang.
He hun kaihruaitu Chief Minister chuan kut hnathawkte Ni, 14th January 2013 a puan tur kut hnathawk tha thlangtu tura ruat Committee Pu Rualzakhuma IAS (Rtd.) leh a thawhpui mithiam leh mihmingtha rualten NLUP hmanga hmalakna ah an tuipui leh hma an lakpui avangin lawmthu a sawi.
Pu Hawla chuan, NLUP hmasaah inbuatsaihna mumal awm lovin an lo tiam tawh NLUP tanpuina chu party bil sawi lovin an kalpui mawp mawp a, a hlawhtlinna pawhin duhthu a sam lo nachungin, rinawm leh taima taka hmala tak taktu hlawhtling leh dingchhuak mi tam tak an awm thu a sawi a, tun tum NLUP changtlung zawk inthlan dawna an lo tiam erawh hi chu kum 2 chhung zet inbuatsaihna hun an neih avangin, fel famkim lo awm mahse, a hlawhtlin hle a beisei thu a sawi bawk.
NLUP hlawhtlinna atan Kohhran, NGO leh mithiam ten theih tawp an chhuahpui avangin lawmawm a tih thu Chief Minister chuan a sawi a, Kohhran inkhawm sermon ah hialte mithahnemngai ten an au chhuahpui chu ropui a tih thu a sawi.
Ministry siam anih veleh Prime Minister leh Central lam hotute an dawr nghal a, Prime Minister te leh hotu dangten an lo tuipui hle a, chhungkaw 1,20,000 tuam turin cheng vaibelchhia 1900 tawk tura an duan lain, cheng vaibelchhia 2700 an lo pek tak zawk chu, “Ringlo mite rilru ah kan Pathian-in hnathawkin, rethei leh pachhiate mai bakah chhumchhiate lamin leirem an rah theih nan min duan sak a ni” tiin Pu Hawla chuan a sawi.
Pu Rualzakhuma, Chairman, State Selection Committee of Successful Farmers chuan, kut hnathawktu tha leh taima thlan a ni tur chuan Mizo zingah inelna tha leh phurna nasa tak a pian chhuah tir a beisei thu leh Mizoram hmasawnna atan thil tangkai tak anih a beisei thu a sawi.
He meeting ah hian Pu H. Liansailova, Nodal Minister of NLUP; Pu R. Selthuama, Chairman, NLUP Implementing Board (NIB); Pu P.L. Thanga, Vice Chairman, NIB; Pu Rualzakhuma, Chairman, SSC on Successful Farmer leh he Committee a member-te bakah NIB official-te an tel a ni.
