No.4289/2021-2022
Aizawl, the 16th March 2022: Prof S. Sundar, Director, Institute of Technology (NIT) Mizoram chuan vawiin khan Governor Hari Babu Kambhampati chu Raj Bhavan-ah a kawm a. Prof S. Sundar hi mithiam tak niin March 2 khan Director, NIT Mizoram atan ruat a ni a; hemi hma hian Department of Mathematics, Indian Institute of Technology (IIT) Madras ah Head Of Department mawhphurhna a chelh a ni.

Governor Hari Babu Kambhampati chuan NIT Mizoram dinhmun leh hmachhawp hrang hrang te Director thar hi a zawt a. NIT Mizoram Campus chhungah zirna in leh hmunhma sak hna tan a nih thuai theih na turin NIT hotute chu tan la tur leh a theihna zawnah chuan lo tan ve a tum thu te pawh a sawi a ni. Tun dinhmunah NIT Mizoramah zirtirtu thawklai chu sanctioned post awm zat atanga chhutin 50 % vel chauh a la ni chu tanlak a ngai thu a sawi a. Zirtirtu lakluh belh kawngah Director thar chu tang turin a fuih a ni. Governor chuan India rama Technology Institute tha ber zinga mi NIT Mizoramin kan nei chu kan vannei hle a ni tih a sawi a. He zirna hmuna Mizoram chhunga cheng te tan bika Seat hauh sak chu All India Entrance Exam kaltlang hnawhkhah tur a nih avangin kan zirlaite pawhin hei hi an hriat a, an tan viau a ngai a ti a. He zirna in tha tak atang hian Mizo thalai engineer tha tak leh entrepreneur tam tak an rawn in zirchhuak ngei dawn a ni a ti.

Prof S. Sundar, NIT Director thar chuan NIT Mizoram chu India hmarchhak a Technology Institute tha ber pawl ni tur leh India ram hmun tin atanga zirlaite pan chak ni turin a theih tawp chhuah a tum tih a sawi a. A lo thawh tawh na thin, IIT Madras nena thawhhona thuthlung pawh ziah fel thuai an inbeisei thu a sawi a ni. Zirlai tam zawk an neih theih nan zirtirna lakluh belh turin hma lak tum a ni a ti a. NIT Mizoram Campus chhungah building sak a nih thuai theih nan sawrkar puihna an mamawh tih sawiin tunah hian Environmental Clearance la nghah mek a ni a ti.

NIT Mizoram hi kum 2010 khan din a ni a. NIT ho hi India rama Engineering leh Technology lam zirna (institute) zinga tha ber pawl a ngaih a ni. Tunah hian NIT Mizoram hian B.Tech, M.Tech leh PhD Degree zirna kalpui mek a ni a. Zirtirtu 75 awm turah 38 an awm mek a. Zirlai 744 bawr vel session khat chhungin an awm thin a. Hetah hian Admission ti tur chuan All India Entrance Exam- Joint Entrance Exam (JEE Main) paltlang a ngai a ni.

Prof S. Sundar, NIT Director thar leh Governor inkawmnaah hian Dr Lalthanchami Sailo, Registrar, NIT pawh a tel a ni.