Nithum awh "Children's Film Festival 2020" chu vawiin khan Graceland School, Khatla-ah khar a ni.

Naupang pual film Kutpui hi January ni 29, 2020 khan Vanapa Hall-ah Pu R. Lalzirliana, Minister Art & Culture Department chuan a hawng a. Nimin ni January ni 30, 2020 khan Vanapa Hall-ah neih chhunzawm niin vawiin khan Graceland School, Khatla-ah neih chhunzawm leh aniin tlaiah he film festival hi Graceland School-ah hian kharna hun hman a ni.

Children's film festival kharna-ah hian Pu Lalchuailova, Deputy Director, Art & Culture Department chu khuallian a ni a, khuallian hian Children's Film Society of India-in Mizoram a naupangte puala film tha en tur inkawhhmuhna leh hemi atana kawng eng tak min sah kuak sak avangin lawmthu a sawi a, tunlai khawvel thangzelah naupangten Media hmang tangkai a, nun kaihruai thei film tha te thlang thiama en tam turin a chah a ni.

Children's Film Festival 2020 hi school 8 (pariat) atangin school naupang 1000 chuangin an chhim a. Heng school naupangte tan hian Film tha tak tak chhuahin entir thin a ni a. Children's Film Festival 2020 hi Ministry of Information & Broadcasting, Government of India hnuaia Children's Film Society of India (CFSI) leh Art & Culture Department, Government of Mizoram te tangkawp buatsaih a ni.