Vawiin khan Mizoram Journalists' Association, Mamit District, Annual Conference Vawi - 13 na chu MJA Press Club-ah neih a ni a. Pu Paul Rokima, MIS DIPRO, Mamit District chuan khuallian niin a hmanpui.

Pu Paul Rokima chuan MJA Members-te chu Democracy ramah chuan hna pawimawh tak thawk kan ni a, Investigative Journalism lam uar tura chahin kan thil hriatte chu a tlangpui leh a thekthuaka hre lovin a chin chhuaka zirchiangin, thudik ziktluak hre tura taihmak chhuah turin a chah a. Thudik tan tlat chungin mahni tanghma hai avang emaw a, thil uchuak taka puanzar kawngah fimkhur turin a chah bawk. Thudik puanzar kawngah awn bik nei leh tan lam nei lovin dikna tanin, nasa lehzuala MJA hminga chetchhuahna kawngah lungrualna tha lehzual nena tanla turin a chah bawk.

Pu C. Lalramdinzela, President, MJA Mamit pawhin thusawiin hun lo la awm turah thawhhona ?ha zawk nena lungrual taka kal zel turin a sawm a. Journalists hna chu eizawnna atana thlangtu kan nih tawh avangin, kan nih chhan leh thawh chhan hrereng chunga pawl zahawmna vawnghim tlat a, pawl anga thiltihna reng rengah mahni leh nihna aiin pawl dah hmasa zel ila, chu chuan pawl a chawisang a, member-te pawhin zah kan kai zawk thin a ni a ti. MJA zahawmna hi nih chhuah tur ni lovin, a thawha thawh hlawh tur a ni tih hrereng chungin ram leh khawtlang tana mawhphurhna hlenchhuak turin member-te a sawm a ni.

He hun hi Pu P.C Lalthanzuala, Vice President MJA, Mamit chuan kaihruaiin chawhnu hunah Rorelna leh hruaitu thar thlanna DIPRO, Mamit hovin neih zui nghal a ni a.

Kum 2020-2022 chhunga MJA, Mamit MJA Hruaitute chu heng mite hi an ni.
1. President P.C Lalthanzuala
2. Vice President - RD Darthanzauva
3. Treasurer - Lalrinsanga te an ni.