Vawiin khan Convention Centre, Lunglei-ah Lunglei District Mizoram Journalists Association (MJA) Annual Conference vawi 14-na ropui taka hman a ni a. I&PR Department changtu Minister Pu Lalruatkima chu khuallian niin Vice Chairman HPC Lunglei Pu Lawmawma Tochhawng chu khualzahawm a ni. MJA Gen Hqrs President Pu Zonunsanga Khiangte leh a thawhpuite pawh he hunah hian an rawn tel a ni. MJA Lunglei District Annual Conference lawmna ah hian MJA Member-te bakah Lunglei District sawrkar official-te, tlawmngawi pawl hrang hrang aiawhte, khawtlang hruaitute, zirlai pawl hruaitute leh sawm bik dang mi thahnem tak an kalkhawm a ni.

He hun Pu Lalrintluanga Khiangte, Vice President, MJA Lunglei District kaihhruaiah khuallian Pu Lalruatkima, I&PR Minister chuan MJA Lunglei District-in Annual Conference 2020 an hmang chu duhsakna hlanin, mipui rorelna sawrkar democracy ah Journalist te chu 'The Fourth Estate' tih hiala koh an ni a, ram hmasawnna mawhphurtu pawimawh berte zing ami an ni, a ti a. Sawrkar hmalakna hrang hrang puanzar kawngah leh Sawrkar finchhuah kawngah media mi te chu kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah a. Ziakmite chu kan ram tan mi pawimawh tak an ni tiin chanchinbu mite chu thu leh hla hmanga kan ram leh hnam humhalha hma la thintu, kan tawng a bo mai loh nana vawnhim kawngah te leh ziaka thil tam tak min chhinchhiah sak thintute an ni, a ti a. Kan mizo thalai tam tak social media leh online games-te buaipuia lehkha chhiar nachang an hre tawhlo chu pawi a tih thu sawiin lehkha chhiar uar tura infuih turin theihtawpa tan kan lak tlan a tul a ni, a ti a.

A sawi zelnaah Minister chuan Mizoram media ti hmasawn tur leh journalist-te hamthatna chungchang ngaihtuahin I&PR Department chuan theihtawp a chhuah mek thu a sawi a. Nikumah State pawn hmun hrang hrangah Press Tour tum 4 lai buatsaih niin kuminah pawh Press tour tum 4 buatsaih mek niin nikum September thla khan India ram rorelna sang ber zirchiang turin New Delhi-a Bureau of Parliamentary Studies and Training (BPST), Lok Sabha Secretariat ah journalist leh I&PR thawktuten training an neih thu a tarlang bawk. Journalist Welfare Fund tih pun leh pension chungchang te pawh ngaihtuah mek zel a nih thu I&PR Minister hian a sawi a ni.

He huna khualzahawm Lunglei HPC Vice Chairman Pu Lawmawma Tochhawng pawhin thu sawiin ram changkang apiangah ziakmiten ngaih pawimawh leh ngaihsan an hlawh a ni, a ti a. Mizo tawng ziak dan dik  inzirtir kawngah pawh tan kan lak thar a ngaih thu sawiin media-te chu hemi kawnga mawhphurna nei lian berte zing ami an ni, a ti a. Lunglei High Powered Committee (HPC) leh Lunglei MJA ten kum tam tak kalta atanga thawhhona tha tak an lo neih tawh chu chhawmnung zel turin kalkhawmte tanrual puiah a sawm a. HPC sum kaltlanga ei leh bar kawnga intodelhna leh mipuite tana eizawnna ngelnghet siam sak a duh thu pawh sawiin a hmalak zel naah thurawn pe fo thin turin journalist te chu a sawm a ni.

He huna thu sawitu dang MJA Gen Hqrs President Pu Zonunsanga Khiangte chuan MJA Lunglei District Annual Conference 2020 palaite chibai bukin “MJA in hmasawnna tam tak neiin hmalam kan pan zel hi a lawmawm takzet a ni” a ti a. MJA member kalkhawmte chu thudik tan tlat a, thlei bik nei lova thu puang darh zel tura fuihin mipuite sukthlek siam sak tu leh mipui rawngbawltu pawimawh tak an ni tih hre thar turin a chah a. I&PR Department kaltlanga Press Tour leh training buatsaih thin chu journalist ten an tangkaipui takzet thu sawiin Advertisement rate tih san ani pawh lawmawm an tih thu a tarlang. 

Pu H. Lalthansanga, MJA Lunglei President pawhin Presidential Speech neiin MJA Lunglei District Annual Conference 2020 hmang tura lo kal te chungah MJA aiawhin lawmthu a sawi a. MJA in Miss Mizorama Lunglei District aiawh tur an thlanchhuah Miss Mizoram Lunglei R. Lalsangzeli, Thenhlum khua inhmelhriat tirna leh thilpek hlanna hun  hman a ni bawk. 

Pu V. Rokhawlkima, General Secretary leh Pu F. Lalngaihzuala Treasure hnen atangin report ngaihthlak niin Pu Lianchama Chhangte, Fin Secretary in lawmthu sawina hun a hmang bawk.

MJA Lunglei District Annual Conference 2020 hman zawh a nih hnu hian Minister hian a Department chante Rural Development, Land Revenue & Settlement leh I&PR Department office te tlawhin thawktute nen inkawmhona huna an hmang a. Tun tlai hian Aizawl panin a haw le hang.