Vawiin hian District Panchayati Resource Centre Conference Hall ah Serchhip District MJA te chuan annual Confenrence an hmanga, Dr. Lalzirmawia Chhangte, IAS, Deputy Commissioner chu khuallian a ni.

Confenrence hun hmasa zawk; Pu Kapliana Pachuau, Vice President kaihhruaiah hian khuallian Dr. Lalzirmawia Chhangte chuan thusawiin, India ram democracy rorelna lungphum pawimawh ber pakhat freedom of press  tihhlawhtlingtute chu chanchinbumite leh media lama thawktute in ni a. Mipuite nun kawng dik hrilhtu, ngaihdan tluang leh awmdan mawi zirtirtu in nih avangin in zalenna mite tana a tha zawnga hmang zel turin ka ngen che u a, ram leh khawtlang rawngbawlna hna thawk ho zel tuin thawhpuiah ka sawm che u a ni, a ti. Dr. Lalzirmawia Chhangte chuan, Serchhip ah January ni 13 atangin ka rawn awm tan a, mipuite an felin an rilru a tluang em em mai a, ka ngaih a ngamin ka rilru a bet thlap mai a, ka lawm hle a ni, a ti a. Serchhip District hian kawng tam takah vanneihna kan ngah bikin ka hria, mipui kan hlanga; ram laili kan lo luah bawk a Mizoram kan inti neitu em em a, he remchanna hi kan hman thiam zel chuan hmasawnna kawngah min tichak hle thei dawn a ni, tiin Serchhip district a hmuh dan a tarlang bawk.

He hunah hian Pu C. Ramengmawia, President, Serchhip MJA chuan thusawina hun a hmang a, a hminga hruaitu a nih ve lai taka Serchhip Press Club bultanna tur sawrkarin a ngaihtuah sak chu lawmawm a tih thusawiin, ram petu Health Department chungah pawh lawmthu a sawi a. A ruhrel chauh la thleng mai an nih avanga sawrkar lam pawh an la dawr chhunzawm a ngaih tur thute sawiin member te tan sauh sauh a tul thu a sawi a ni.

MJA General Headquarters lam aiawhin Pu Lalremsiama, Vice President, MJA General Headquarters chuan thusawina hun a hmang ve bawk.  He inkhawmah hian Pu Lalrochhuanga, General Secretary leh Pu R. Lalmuansanga, Treasurer ten report an pe bawk a ni. 

Hun hmasa inkhawm hi YMA, MUP, MHIP leh sawm bik mi pawimawh ten an telpui a. Chawhnuah hian rorelna nei zuiin, tlaiah an inthlang a, zanriah an kilho nghal a ni.

Attachment

  • Loading attachment...