986/2026-2027

Aizawl the 12th June 2026: Vawiin khan NITI Aayog leh hmarchhak Chief Minister leh Chief Secretary ten NITI Aayog office, New Delhi-ah inkawmhona an nei a. Chief Minister Pu Lalduhoma chuan Mizoram sorkar mamawhte leh hmarchhak bialin chak zawka hma a sawnna tur thilte a thlen.

Chief Minister chuan, NITI Aayog member atana hmarchhak mi Dr. Joram Aniya ruat a nih avangin lawmthu a sawi a. Tin zawn neia hmarchhak state hruaitute tana meeting an buatsaih chu tha a tih thu a tarlang.

A thusawi tlangpuite chu:

1. Mizoram tana 'All India Service (AIS)' Cadre hran neih a tul thu leh a pawimawhzia a thlen a. Hemi chungchangah hian Arunachal Pradesh Chief Minister Pema Khandu nen pawh hma an la dun a. State hmasawnna atana cadre hrang neih a tulzia leh a hlawkna tur hrang hrangte he meeting-ah hian an sawi lang a ni.

2. Thenzawla Peace City din tura hmalak mekna a tarlang a. Prime Minister Indira Gandhi ngenna avanga remna hna thawk tura Police hna a bansan thu te, MP nihna chawlhsan thu leh mimal taka a lo tawrh ve na te hriatsak chunga Peace City hmasawn zelna tura theihtawp chhuahpui zel turin a ngen.

3. High Level Task Force on Northeast Economic Corridor-a Convener a nihna angin Thailand thlenga kal tur India-Myanmar-Thailand (IMT) Trilateral Highway chu tihhlawhtlin vat a tul thu a sawi a. Kaladan Multi Modal Transit Transport Project (KMMTTP) pawh ti khawmuang tawh lo a, a hun taka zawh ngei tha a tih thu a sawi.

4. Aspirational Districts and Aspirational Blocks Programme hnuaia Hmarchhak bial, a bikin Mizoram chhunga a huam chinte ennawn a tul thu a tarlang a. Tuna hman mek tehfung (criteria) te hian tlangram leh ramri hrula awm State-te dinhmun dik tak a pho chhuak tawk lo tih a sawi lang a ni.

5. Centrally Sponsored Schemes kaihhruaina (guideline) chungchang sawiin heng central kaihhruainate hi Northeast-ah a nih ang anga hman rem lo tam tak a awm a, kan tlangram mila siamrem leh herrem a tul thu a tarlang a ni.

6. Mizoram Ginger Mission hnuaia sawhthing sawngbawlna din tur te tihhlawhtlin vat a nih theihna turin NITI Aayog puihna a ngen.

7. Tourism lama kan hmasawnna tur hrang hrang bakah Sports Department hnuaia Empowering Mizoram Sports kalpui mek a nih dan leh hmasawn leh zelna tur kawng hrang hrangte a tarlang.

8. Hmarchhak States te tana 10% Gross Budgetary Support sawrkar laipuiin a duan chu a tangkai hle a. Hemi hnuaiah hian funding hi a nihna ang taka state te pek a, state sawrkarin scheme a duan te leh hmasawnna hna pawimawh bikte thawh nana hman theih tura siam a tul thu a tarlang bawk a ni.

Inkawmhonaah hian NITI Aayog CEO Pi Nidhi Chhibber chuan kal khawmte lawmna thu a sawi a, Vice Chairman Ashok Kumar Lahiri chuan inkawmna an buatsaih chhan leh an ngaipawimawh thilte tarlanna a nei a ni.