Vawiin khan Chief Minister Pu Lal Thanhawla chu Nizung (Solar) hmanga kawlphetha siamtu company Pune a hmunpui nei Relyon Solar Power Private Limited aiawh ten an hmu a, Mizorama nizung hmanga kawlphetha siamchhuah ruahmanna an duan chhin te an sawipui a. Meeting ah hian ICT Minister Pu Lal Thanzara; Principal Secretary to Chief Minister Pu Lalram Thanga; Power & Electricity Department Secretary Pu H. Lalengmawia, IAS leh P&E Department Engineer-in-Chief Pu L. Pachuau leh a thawhpui te an tel a ni. 

Chief Minister Pu Lal Thanhawla chuan nizung hmanga kawlphetha siamchhuah chu kawlphetha a intodelh lo Mizoram state te tan thil tangkai leh tha tak nia a hriat thu sawiin hei hi Sawrkar pawhin a ngaipawimawh a, chuvangin tunhnaia Solar Power Policy te hman theih turin chhawpchhuah a ni tawh a ti a. Tunlai khawvel boruak chhe mek leh sik leh sa inthlak danglam nasaah solar power hi kawlphetha thianghlim ‘clean power’ a ni a, ngaihpawimawh a hlawh hle a, mahse a man sang leh kawlphetha khawlna battery technology hi a daltu lian ber a ni, a ti bawk. 

Relyon Solar Power hian an ruahman an siam lailawk te leh ramchhung hmun danga hna an thawh tawh te power point presentation hmangin an tarlang a. An ruahmanna ang chuan an sum sengin kawlphetha siamchhuahna 40 MW power plant an bun duh a, hemi atan ram mamawh chu man neiin lease-a hawh a ngaih pawha an inhawn thu sawiin hemi bakah hian rooptop solar installation leh solar water pumping te pawh a tih theih thu an sawi bawk. 

Chief Minister chuan P&E Department hotute hnenah an proposal siam chu zirchiang turin a ti a, Assam nena he company in thawhhona thuthlung an siam tawh pawh zirchiang turin a hrilh bawk a ni. Relyon Solar hi kum 2010 a din company niin an sawi danin tunah hian state 15 velah hna an thawk mek a, hei bakah hian railways leh PSU thenkhat pawh an thawhpui mek bawk a ni.