Vawiin khan Secretariat Conference Hall-ah Mizoram Sawrkar leh United Nations Development Programme (UNDP) mithiamte buatsaih Procurement Handbook for Goods, Services and Civil Works zirhona hun neih a ni a. Finance Minister Pu Lalsawta chu khuallian niin Mizoram Sawrkar hnuaia department hrang hrang hotulute an tel a ni.
Pu Lalsawta chuan sawrkar leh mipui mamawh bungrua, hmanrua leh thil tul dang lakkhawm (procurement) hi sawrkar inrelbawlnaa thil pawimawh ber te zinga mi a ni a; thil lei chungchangah langtlang, hlawk leh felfai zawka kalpui a nih theih nan Mizoram mila inkaihhruaina changtlung tak buatsaih a lo ni ta chu thil chhinchhiahtlak leh tangkai tak a nih ngei a beisei thu a sawi. Government procurement tidanglama, kalphung tha zawk la lut tura hun rei tak an lo nghah tawh chu a takin a rawn thlen tir dawn nia a ngaih thu leh sawrkar laipui General Financial Rules 2017 dah tel a nih bakah kumin July ni 1 atanga hman tan tur Goods and Services Tax Act nen pawh inhmeh tak tur a nih avangin Finance Minister chuan lawmawm a tih thu a sawi a. New Economic Development Policy (NEDP) Core Committee hmaah pharh a nih tur thu a sawi bawk.
Mizoram sawrkar chuan kum tin budget pumpui atanga za a 25 vel zet chu goods, services leh works lam khawm nan a hmang thin a. Heng atang hian hmasawnna hna development programme hrang hrang kalpui thin a ni. Mi thiamten an chhut danin kum tin cheng vaibelchhe 2000 zet procurement atan a kal ral thin a. Senso a tam em avangin fimkhur leh awmze nei zawka hman a nih chuan sum tam tham tak mipui tan humhim (save) theih a nih beiseiin Mizoram Sawrkar chuan UNDP mithiamte ruaiin an ni hian uluk takin Mizoram Sawrkar inrelbawl dan an zirchian hnuah he Procurement Handbook hi an tichhuak ta a ni. He lehkhabu buatsaihtute hian GFR 2017 te, New Procurement Framework of World Bank te, UN Procurement Procedures te leh Ministry of Finance and Incoterms 2010 buatsaih Policies & Procedures te rawn chungin lehkhabu hi an siam a ni.
Procurement Handbook zirhona programme hi Planning & Programme Implementation Secretary Dr.C.Vanlalramsanga’n a kaihruai a. UNDP Procurement Expert Pu Krishan Batra chuan lehkhabu kalphung tlangpui sawifiahna a nei a. Zawhna leh chhanna hun hman zui a ni.
