Vawiin khan East Tuipui Bialtu Pu T. Sangkunga leh Hrangturzo Bialtu MLA Pi Vanlalawmpuii Chawngthu te chuan Tuipui-Tuichangral Games 2017 kharna hun (Closing function) Khawbung khelmual-a neih an hmanpui. 

Kharna huna khuallian Pu T Sangkunga chuan thusawiin infiamna chi hrang hrang chu taksa hriselna atan a pawimawh mai bawkah eizawnna atana hman theih a ni, a ti a. Tuichangral leh Tuipuiral-in Minisports complex thar an nei mai tur chu thalai infiamite tan thil lawmawm tak a nih thu a sawi. 

Khual zahawm  Pi Vanlalawmpuii Chawngthu pawhin infiammite fuihin sawrkarin an tana remchanna nasa tak a buatsaih sak hi hmang tangkai turin leh hmeichhe infiammite pawh chhungkaw nu nih thulh chuang si lova infiammi hlawhtling tak a nih zuih theih tih hre thar leh turin a chah bawk a ni. 

Vawiina Hmeichhe Football final-ah Samthang leh Buang inkhelin Buang an champion a, Mipa Football final-ah N. Vanlaiphai leh Khawlailung ten final an khel a.  Hmeichhe Volleyball-ah Dungtlang leh Khuangleng-in final khelin Dungtlang an champion a,  mipa Volleyball Final chu Khawhai leh Biate te'n khelin Khawhai an champion thung a ni.