Mizoram Sorkar thuchhuah chuan Mizoram a miretheite khai chhuahna tura Sorkar Policy pui ber leh Flagship Programme nibawk NLUP chu NLUP Implementing Board kaihruaina in Line Department tinte enkawlna hnuaiah tluang takin a kalpui mek zel a, 1st Phase ah chhungkua 45139 thlan a ni tawh a,tanpuina pawh pek nghal mek an ni . 1st Phase tanpuina pawisa hi 1st Installment leh 2nd Installment pek mek an nih laiin Oct. 2011 atangin 2nd Phase atan Mizoram pumah chhungkua 45000 thlang leh nghal turin DC tinte hnenah vawiin Dt.5/10/2011 hian hriattirna a ti chhuak a ni .Khawpui chhunga beneficiaries, Industries Department hnuaia 1st Phase atana NLUP tanpuina dawngtu tur te pawisa pawh Industries Department chuan sem mai theih turin a la chhuak tawh bawk a ni.

NLUP dawngtur hi Mizorama tlawmngai pawl hrang hrang leh VC ten uluk taka Baseline Survey an neih atanga chhungkua thlan chhuah te an ni a. Thil kalphung a fel zawknan Sorkar chuan NLUP dawngtu tur hi phase hrang hrang a pek tur in a ruahman a, Phase I-na leh phase 2-na hian avaiin chhungkua 90139 a tuam dawn a, a bak chhungkua te hi 3rd leh 4th phase ah tanpui an ni ang.2nd Phase a thlanchhuah te hi DC leh Line Department ten an Trade tur uluk takin an thlanpui nghal dawn a,November thla chhung ngeia Trade thlan pawh hi peihfel hman tura beisei a ni.Hemi baka 3rd leh 4th phase ami tur pawh thlan fel nghal tur an ni a,anni erawh hi chu an trade tur la thlan tir rih lovin a hnu a siamfel leh tur a ni ang.

Tunlai hian NLUP dawng mekte hnathawh that leh thatloh DC tinte leh NLUP line Department ten uluk takin an endik mek a,an pawisa dawn chhan anga hmanglo chhungkaw tamtak man chhuah te pawh pek chhunzawm loh turin hmalak mek a ni.Khaw tina NLUP dawngtute hnathawh that leh thatoh viltu tur Village Level Monitoring Committee bakah District Level Monitoring Committee te pawhin urhsun takin hma an la mek bawk.

Hetianga NLUP 2nd Phase dawngtur buaipui a nih mek lai hian Chief Minister Pu Lal Thanhawla hova NLUP hotute thukhawm rel angin thingtlang kut hnathawktute Sapthei thar chhuah chu NLUP sum hmangin MIFCO kaltlangin Chhingchhip khaw bula an factory hmunah Sapthei kg khat Rs 12/- in September 29, 2011 khan an leisak tan ta a, lei chhunzawm zel tur a ni.