Vawiin khan NLUP Apex Board chu Secretariat Conference Hall-ah an thu khawm a. Meeting hi Board Chairman, Pu Lal Thanhawla, Chief Minister-in a kaihruai a. Line department 8 ten an hma lakna kal mek leh hmasawnna report an pe a. District hrang hrang Monitoring Committee Chairman ten an bial chhunga NLUP kalpui mek an hmuh dan leh rawtna an neih te Apex Board meeting-ah hian an thlen bawk.

Line department 8 te report atangin NLUP thawh khatna hnuaia hma lakna hrang hrangte chu a tha thawkhatin beiseina sang tak nen hma lak chhoh zelna tur an ruahman a. Kut hnathawktu tam takin an hnathawh rah hlawkna an tel tan der tawh a ni. Horticulture department hnuaia hmalakna pakhat, Sekhum-ah chuan serthlum chi tha chi an chin chu kum 3 ah a rah lawh tur a awm tawh a. Chutiang bawkin hmunphiah chingtu te, sangha dil siamtute leh ran vulhtu tam takin an hlawkna an tel tan mek a ni.

Department ten harsatna leh mamawh an thlen zingah Apex Board chuan AH&Vety department-in bawngvulhtu te tan bawngpui chi tha, hnute tam chi, Haryana atanga lakluh na tur phurh man an mamawh belh chu pek a remti a. Sericulture department in kut hnathawktu te thar chhuah leisakna tura revolving fund sum an mamawh pawh ngaihtuah sak a remti bawk a ni.

Meeting ah hian NLUP kalpui zelnaa fimkhurna tur te sawiho a ni bawk a. Chairman Pu Lal Thanhawla chuan NLUP chu sorkar flagship programme a nih angin a monitoring chungchangah department tinin NLUP chu ngaih pawimawh berah an nei tur a ni a ti a. Sericulture leh hmunphiah te chu englai pawha market ah harsatna awmlo a nih avangin kut hnathawktu tam zawk hemi lama kal tura infuih a pawimawh hle a ni, a ti bawk.