Vawiin khan NLUP Apex Board chuan Chairman Pu Lal Thanhawla, Chief Minister hovin NIB conference hall-ah special review meeting an nei a. NLUP kalpui mek dan uluk takin an thlir ho.

Chief Minister Pu Lal Thanhawla chuan NLUP thil tum bulpui ber chu mirethei te dinhmun chawikan a ni tih sawi nawn leh in NLUP sum cheng khat pawh a bo thlau thiang lo, a ti a. NLUP ti hlawhtling tur hian a enkawltu Implementing Board leh line department te mawhphurhna a sang em em a ni, a ti. NLUP atana central sorkarin Mizoram chunga rinna a neih chu kan hloh vaih chuan a hnam ang pawhin min ring leh tawh lo vang, tiin Pu Lal Thanhawla chuan NLUP kalpui danah siam that ngai awm apiang te siam tha turin huai takin kan pen mai tur a ni, a ti bawk.

He meeting ah hian NLUP cluster hrang hrang bialtu MLA ten an bial chhung dinhmun tlangpui tarlangin beneficiary te harsatna neihte an sawi a. Harsatna ching fel tura rawtna hrang hrang te sawi ho a ni. NLUP hnuaia thlai tiak supply chungchang ah leh hmalakna hrang hrang ah te beneficiary te harsatna chhawk zangkhai tur zawnga hmalak a pawimawh zia sawiin Pu Lal Thanhawla chuan line department te chuan anmahni hlawkna tur ngaihtuah lovin mirethei te tana tha ber turin hma an la tur a ni, a ti.

Thlai tiak supply chungchang leh harsatna dang te sukiang tura rawtna hrang hrang te enzui a, a tul anga hmalak zui dan tur hi Chief Minister hovin NLUP Nodal Minister, Chief Secretary leh NIB hotu ten an ngaihtuah thuai dawn a ni.

Vawiin NLUP Apex Board meeting ah hian Speaker leh Deputy Speaker te, Minister zawng zawng te, NIB Chairman te, Parliamentary Secretary te, Deputy Chief Whip leh District Level NLUP Monitoring Committee Chairman, te, MizoramYouth Commission Chairman te, Chief Secretary leh NLUP Apex Board Member thahnem tak leh line department hotute an tel a ni.