NLUP Implementing Board-a Chief Media Officer Pu David L. Thangliana, MIS, chuan vawiin khan Serchhip khawchhunga NLUP hmalakna thawh dan a hmuna kal chilhin a enfiah a, Industries Department hnuaia Carpentry thlangtu leh AH&Vety hnuaia Vawkvulh thlangtu te kawmin an hnathawh dan te a enpui a ni.

Vawiina NLUP Carpentry thlangtu pakhat Rohnuna, Serchhip Field veng ami hi bengngawng tawngtheilo a ni a, Thing Mistiri thiam tak niin NLUP an dawn hma hian mi bungraw hawhin thil a siam thin a, NLUP dawng tura thlan ani tih a inhriat veleh Aizawlah Mistiri bungrua a ba in a la a, NLUP dawn apiangin a ba chu a rull thin a, tunah chuan an chhungkaw eibel ber anih tawh thu Rohnuna Nu Pi Laithangpuii chuan a sawi a, chawhrualin thlatin Rs. 30,000/- vel la lut ang an nih tawh thu leh, an thilsiamna senso paih hnu ah poh Rs. 15,000/- bawr vel lalut ziah anga an inchhut thu a sawi bawk. Tunah hian Mistiri bungrua a mamawh ang chu a nei kim thawkhat tawh a, rawng kahna khawl thlengin a nei kim tawh a, NLUP Third Installment an dawn atangin Thingzai herna khawl a lei bawk a ni.

AH&Vety hnuaia Vawkvulh thlangtu hi Pu C.Lalnuntluanga, Serchhip Dinthar Farm Veng ami a ni a, tunah hian NLUP sum a dawn tur ang chu dawngkim tawhin vawk 10 a vulh mek a, Vawk talhna atang hian Rs. 1,00,000/- chunag a lakluh tawh thu leh, Vawkte hralhna atang Rs. 60,000/- chuang a lakluh tawh thu a sawi bawk.

NIB Chief Media Officer hian nimin lamah Khawlailung leh Piler bakah North Vanlaiphai a NLUP hnuaia Sangha khawi te leh Coffee chingte bakah Leilet siamte a tlawh a, naktuk zingkarah hian Serchhip Zawlpui phaia Fisheries Department in NLUP hnaua an hmalak dan a enpui bawk ang.