Vawiin khan cheng nuai 65 senga sak NLUP Implementing Board(NIB)conference hall chu Chief Minister Pu Lal Thanhawla’n a hawng a. Hetah hian NLUP thuneitu sang ber Apex Board thutkhawm vawi 11-na neih nghal a ni.

He meeting ah hian NLUP Phase I leh Phase II kalpui tawh china line department te hmalakna leh district hrang hrang dinhmun te, Phase III atana inbuatsaihna kalpui mekte thlir ho a ni a. Hemi rual hian NLUP kalpui tawh china harsatna tawh te leh scheme kalphung her danglam ngaite pawh sawi ho a ni bawk.

Chairman Pu Lal Thanhawla chuan mipuite hnena an lo intiam tawh angin, tun kum 3 kal ta chhunga Mizoram sorkar-in tluang taka NLUP a kalpui chu lawmawm a tih thu a sawi a. Zoram hmun hrang hrang-ah NLUP hmalakna in hma a sawn zel a, he project avang hian kum reilo te ah Zoram hmel thar a lang dawn a ni, a ti a. NLUP chu engti kawng mahin a hlamzuih thiang lo tiin member te chu kut hnathawktu te tan an finna leh theihna te thawh khawm turin a sawm a. NLUP line department zawng zawng te pawh mahni hna a tui tur leh suma rinawm turin a chah nawn bawk.

NLUP Phase I ah hian beneficiary 45139 tuam chhuah niin Phase II atan 45000 dang thlan an ni tawh a. Tun kum 3 chhunga NLUP atan sum ruahman dan chu 2010-2011 ah vaibelchhe 234.82; kum 2011-2012 ah vaibelchhe 234.00 leh kum 2012-2013 atan vaibelchhe 370.00 bakah RKVY atangin vaibelchhe 40.00. Phase I a beneficiary zinga 143 ten hma an lak theih loh avangin a taka hma latu chu 44,996 an ni.

NLUP kalpui mek chinah scheme thenkhat chu beneficiary te mamawh mila siam that ngai a awm nual tih Chairman chuan a tarlang a. Horticulture department hnuaia thlai chi supply dan chu ennawn ngai a ni tih sawiin Industries department hnuaiah agarbati kuang siamna khawl chak zawk ngaihtuah a, beneficiary te hnena mau supply na tur pawh her danglam a ngai, a ti a. Trade hrang hrangah beneficiary te chu, an awmna area chhungah an trade thlan duh a awm lo te a nih ngawt loh chuan, an tuina lo trade thlan luih tir an ni tur a ni lo, a ti.

AH&Vety department hnuaia Dairy Farming thlangtute zinga vanduaina tawkte chu a theih dan ang anga tanpui an nih tur thu Chairman chuan sawiin NLUP bawng lian dawngtu mi 186 atanga zirchianna neihah 80% chu eizawnna tling ngei an ni a ti a; hemi rual hian bawngvulhtu ten nitin MULCO-a bawnghnute an chhun thin chu NLUP vangin nitin 800 litres zel a pung tawh tih a sawi bawk.

Industries department hnuaiah beneficiary ruahman aia tam an awm vangin a tirah hma la chak lo mah se, tluang takin an kal thei tawh a. A bikin autorickshaw leh tailoring thlangtu ten an tanpuina dawn an hlawkpui bakah department-in a hlawma autorickshaw leina atangin Rs.2,27,500/- leh USHA puanthui khawl leina atangin Rs.19,34,625/- an hum thei a. Hemi rual hian NIB pawhin conference hall inchhung bungrua te market rate aia tlawm vekin an lei a. Hetianga neitu thinlung pua Industries leh NIB ten hma an lak hi Chairman chuan chhuanawm a tiin sorkar department zawng zawng ten entawn se, a ti.

Serchhip district ah Horticulture beneficiary Pu Biaklawma chu, a fapa in I&PR department hnuaiah UDC hna a hmuh tak avangin serthlum huan siam nan first installment a lo hmuh tawh chu sorkar-ah a pe kir a. Beneficiary zingah hetiang mi rinawm leh entawn tlak an awm hi Chairman chuan lawmawm a tih thu sawiin Horticulture department chu Pu Biaklawma hnenah a sum pe let a, a trade thlan thawh chhunzawm tir turin a ti.

He meeting ah hian NLUP Nodal Minister Pu H.Liansailova, NIB Chairman Pu R.Selthuama, Chief Secretary Pu Vanhela Pachuau leh NIB Vice Chairman Pu P.L.Thanga ten NLUP chungchanga hriat tur pawimawh te an sawi a. District 8 atangin D.C ten report an pe theuh bawk a ni.