Vawiin hian Serchhipah NLUP 3^rd leh 4^th Phase-a Ar vulh thlangtute hnenah Ar chaw bag 2 theuh sem a ni a, hei hi Ar vulh thlangtuten NLUP tanpuina an dawn hnuhnung ber tur a ni. 

Ar chaw hi AH & Vety Department Office tualah sem niin Dr. R. Lalmakthanga, Chief Veterinary Officer Serchhip chuan Serchhip District chhunga NLUP hnuaia Ar vulh thlangtute hnena tanpuina an pek tawh dan tlangpui sawiin, Serchhip Cluster ah chhungkua 136, Tuikum Cluster-ah chhungkua 97 leh Hrangturzo Cluster-ah chhungkua 283 ten ar vulh an thlan thu hi a tarlang. 

NLUP tanpuina hi Kelkang Model anga sem niin Ar in sakna atan Rs. 30,000 pek an ni a, Ar note 150 bakah Ar chaw pekna thleng, Ar tui pekna, Tui dahkhawlna tuizemte, Vitamin leh damdawi pawimawh zualte an pek thu a sawi a. Tunah hian Serchhip District a kan nitin Arsa mamawh te hi NLUP Ar vulhtuten an phuhru chho mek tih sawiin, nakin zelah pawh mipuite Arsa mamawh zualpui chu NLUP Ar vulhtute hian an phuhru chho zel theih a beisei thu a sawi a. Ar vulh thlangtu zawng zawngte chu hlawhtlin zel theih nan tanpui an inhuam reng thu leh duhsakna an hlan vek thu a sawi a ni. 

Ar chaw hi Ar note chaw bag 3, starter chaw bag 6, finisher (a lian chaw) bag 13 sem theuh pek tawh niin, vawiinah hian a hnuhnung ber atan Finisher bag 2 theuh pek an ni leh a ni. 

Nimin khan Tuikum Cluster-a sem niin, vawiin hian Serchhip leh Chhiahtlang bakah Hrangturzo Cluster-ah N. Vanlaphai, Khawlailung leh E. Lungdarah te NLUP tanpuina hi sem a ni bawk a ni.