Vawiin khan Lawngtlai District a NLUP hnuaia Auto Rickshaw dawngtute tana buatsaih ni khat awh Free Service Camp Circuit Hall tual a neih chu Lawngtlai District Bawrhsap Pu J. Hmingthanmawia’n a hawng.

Lawngtlai District NLUP Co-Ordination Committee in ruahmanna a siam angin vawiin hian NLUP hnuaia Auto Rickshaw dawngtute tan Free Service Camp buatsaih a ni a. A tirah chuan Lawngtlai a workshop nei te nen a tih ho mai tum a ni na in NLUP Implementing Board (NIB) lam ruahman puina in Mizoram a Authorized Dealer, Standard Motor Works te nen ngei he hun hi hman a ni ta zawk a ni.

He hun hawngtu District Bawrhsap chuan Lawngtlai a NLUP Auto Rickshaw dawngtute chu sawrkar in a ngaihven zui reng a ni tih sawiin tluang tak leh hlawk taka service zel turin a duhsak a, hei vang hian he hun hi buatsaih a ni tiin a sawi a. Beisei ngam loh Authorized Dealer ngei Servicing nei tura an rawn chhawpchhuah theih avangin NIB chungah pawh kan lawm takzet a ni a ti bawk.

Bajaj Auto Rickshaw Dealer atangin mi 6 an rawn kal thei a, an ni hi Pi Rebecca Lalrindiki, Standard Motor Works neitu ni bawk in rawn hovin an zinga pathum te hi Company atanga inzir chhuak Mechanic an ni. Thu sawiin Pui Rebecca Lalrindiki chuan NLUP hnuaia Auto Rickshaw hi Market Rate aia hniam a pekchhuah a nih thu leh India No. 1 Rickshaw a nih thu a tarlang a, Free Service a nih anga a Free a an khawih sak theih chin a tarlang bawk.

Vawiin ah hian Rickshaw servicing duh in-report 30 vel an awm a, heng zingah hian Lawngtlai khaw pawn atanga lo kal te pawh an awm a; darkar bi zela thenin khawchhung a service tur khaihlak chuang si lova ruahmanna siam in, zing dar 11 atanga chawhnu dar 4 thleng neih a ni dawn a ni.