Chief Minister Pu Lal Thanhawla chuan NLUP avanga intodelh leh hlawhtling chhungkua tam tak hmuh tur an awm hi a lawmawm hle a ni a ti. He thu hi vawiina ‘Kuthnathawktute Ni ‘ Vanapa Halla neiha a sawi a ni.

Chief Minister chuan kuthnathawh hi khawvela hna zahawm leh ropui ber a ni tiin, chawimawi hi an phu a ni a ti a. NLUP hi changtlung zawka kum 2011 January ni 14 a bul tan anih thu sawiin, he ni hi anmahni chawimawina ni ah kan hmang thei dawn a ni a ti. NLUP hi sorkar flagship programma anih angin line departmenta thawkte chauh nilo, sorkar hnathawk zawng zawng ten hria a, an ngaihpawimawh a tul a ni a ti a. Heng tanpuina sum te hi pakhatmah a kawngbo a thianglo a ni tiin, tun thleng hian a kal tur anga a kal hi a lawmawm hle a ni a ti.

Chief Minister chuan Mizoram Gross Domestic Product (GDP) chu Sikkim tiam lovin Hmarchhak State te zingah Mizoram chu 11.7% niin a sang ber a ni a ti a. Hei hi National GDP 7.9% aia sang zawk bawkin, Hmarchhak State te GDP hrim hrim hi 9.95% anih thu a sawi a. Hetianga GDP sang tak kan neih theih nachhan chu kuthnathawktute thawhrimna vang a ni a ti a. NLUP hi a tirah baseline survey neiin, tunah tanpuina dawng chhungkaw 90,000 thlan tawh an ni a ti a. A thawh thumnaah chhungkaw 29,000 thlang lehin, a thawh linaah (4th Phase) chhungkaw 15,000 dawng thei tura ruahmanna siam mek a ni a ti. Rinawmna, taimakna leh thawhrimna nena thawkte chu an hlawhtling der tawh a ni a ti a. Synod Social Front pawhin hmalam kawl a eng hle niin an hria a ni a ti a, Zoram chhimlam kohran hrang hrangte pawhin min tuipui hle a ni a ti. Aizawl district chhunga bawng vulh thlangtute hlawhtlinna avangin bawnghnute 2,600 litres in a pung a ni tiin, Chief Minister chuan MULCO in bawnghunte man ati hniam hial a ni a ti a. Heng bawnghnute pung te hi eitur dang paneer, ghee leh diary product dang danga siam chhuahna turin Chhingchhipah sum vaibelchhe 35 senga a sawngbawlna tur siam anih tur thu a sawi a. Tlem lai deuha bawng vulhtute bawng dawn thi te chu rulh sak an nih tur thu a sawilang bawk a ni.

Chief Minister chuan hmasawnna kan kalpuinaah inlungrualna te, thawhhona tha te leh inchawimawi tawnna a pawimawh hle a ni tiin, intih phur tawn chhoh zelte a tul avangin NLUP hmang tha lawmman te siam anih thu a sawi bawk.

Inkhawm Chairman Pu H.Liansailova, NLUP Nodal Minister chuan Mizoramah kuthnathawktute tan UT nih atanga vawiin thlenga hetiang sum dah ala awm ngailo a ni tiin, lawm a phu reng a ni a ti.Thusawitu dang Pu PL Thanga, Vice Chairman, NLUP Implementing Board in budgeta NLUP atana sum dah anih dan sawifiahin, NLUP kalpui dan tlangpui a sawi bawk a. USA Minnesota University atanga mithiam rual, NLUP zirchiang tura an lokal nachhan te pawh sawifiah bawkin, inhmelhriattirna a nei bawk a ni.Hnam Chhantu leh AMFU President ten thusawina an nei bawk a ni.

Kuthnathawktute Ni hian NLUP ti tha State Levela khua leh mimal anga ti tha te hnenah lawmman pathumna thleng hlan an ni bawk a. Khua ti tha ber 2 awmin, Baktawng Tlangnuam leh Sekhum te niin,thuziak leh sum 2.5 lakhs ve ve an dawng a, Pahnihna Zamuang, Rs 2 lakhs leh thuziak,Pathumna Bilkhawthlir South, Rs1.5 lakhs leh thuziak te an dawng a. District danga khaw 4 Chakhang(Saiha), Phullen(Azl), Hliappui(Champhai) leh Pangkhua (Lawngtlai Dist) ten consolation prize Rs.1 Lakh theuh an dawng bawk a. Stae Level bawka Mimal ti tha pathum, Roluaha, Saipum -Rs. 1.5 lakh leh citation, Lawmsiami, S.Phaileng - Rs 1 Lakh leh citation leh Zira, Bawngva-Rs.80,000leh citation te hlan an ni bawk a. Hengte bakah district levela ti tha 3 te hnenah lawmman hlan an ni bawk. Khua anga lawmman dawngte hian khaihlak awm lova an kal chhoh theih nan an mamawhte pek an ni dawn bawk a, Baktawng chuan Generator an la dawng dawn a ni.

Inkhawmah hian hall lenglo khawpin sorkar hotute leh mipui an kal tha a ni.