Vawiin Dt 14th January 2013 hi KUT HNATHAWKTUTE NI niin hemi ni hi Chhim Veng YMA Hall, Mamitah urhsun takin hman a ni a. Pu John Rotluangliana Deputy Speaker, Mizoram chuan hmanpuiin NLUP hmanga Kut hnathawk hlawhtling thlan chhuah mi pathumte puangin chawimawina thilpek a hlan a ni.

He inkhawm, Pu V. Lalremthanga IAS, District Bawrhsap Mamit kaihhruaiah khuallian Pu John Rotluangliana Deputy Speaker chuan thusawiin kum 2011 January 14-a Vanapa Hall a Mizoram sawrkarin NLUP Launiprmching Programme Chief Minister in a neih zulzuia January 14 Kut hnathawktute Ni siam a ni hi a in hmeh hle a ni a ti a, Miretheite leh rahbi tleu tawhten eizawnna ngelnghet an neih theih nana buatsaih NLUP hi sawi chhetu sawichhiatna karah tluang takin kalpui mek zel niin tunah hian a hlawhtlinna pawh hmuhtheih a lo awm ta hi NLUP dawngtute thawhrah a ni tiin lawmthu a sawi bawk. Khuallian chuan NLUP hi Central sawrkar pawhin min tanpuiin min duhsak a, chhungkaw 1,35,000 lai min phalsak a, a lawmawm hle a ni a ti bawk.

Khuallian chuan NLUP hi thatchhiat inzirtirna ni lovin taimak inzirtirna a nih thu sawiin mitinte kan hma a hnathawh turah taimak kan chhuah a tul thusawiin ram changkang apiangin eng hna pawh thawh an hreh lova, chu chuan changkanna leh hmasawnna an ramah a thlen thin a ni a ti bawk. Khuallian chuan NLUP dawng tawhte, dawng mekte leh la dawng turte pawh theihtawp chhuaha hlawhtling ngei tura hma la tura chahin scheme hmanga tanpuina tawp hnu pawha hlawhtlinna la hmuh lohte enzui puina tur Exit Protocol buatsaih a nih tur thu a sawi bawk.

Pu Lalrinmawia Ralte, Parliamentary Secretary, Home etc pawhin thusawiin sawrkar atanga tanpuina chi hrang hrang kan dawnte a hlutzia chhut chiang lova ngaia neih kan ching hi a pawi hle a, India ram state thenkhatah kut hnathawktu tam tak harsatna in a tlakbuak avanga intihlum an awm mek laia sawrkarin zoram mipui kut hnathawk tute tana dinchhuahna tur Scheme NLUP a buatsaih hi a lawmawm zia kan hriat a tul hle a ni a ti bawk. Pu Lalrinmawia Ralte chuan NLUP Line Department hrang hrangte pawhin kan hnuaia kut hnathawktute pawh an hlawhtlin ngei theihna tura tan lakpui theih turin a chah bawk.

Pu V.L Robiaka MLA Chairman ZIDCO, pawhin thusawiin kut hnathawktute tel lovin hmasawnna tluantling ramin a neih theih loh thusawiin Haw-u, I din thar leh ang u’ tiin kalkhawm ,mipuite a sawm a, hlawhtlinna kan neih hi sawrkar chunga lawmthu kan sawinna a ni tih hrereng turin NLUP dawngtu zawng zawngte a chah bawk.

He kut hnathawktute Ni hman na-ah hian NLUP hnuaia trade hrang hrangte tanga hlawhtling thlanchhuah mi pathum te puan niin chungte chu 1st-na Pu V.L Thlamuana S/O Leha Mamit Hmar Veng, Sugarcane. 2nd -na Pu Vanlalmawia S/o R. Chalngura Chungtlang, M. Orange, leh 3rd-na Pu Lalthanhlira S/o Thana Rawpuichhip M. Orange te niin pawisa fai Rs 75,000/- Rs 50,000/- leh Rs 30,000 leh citation hlan an ni a. Lawmman te hi khuallian in a hlan a ni.

Pu R.S Lalzamliana , Addl D.C Nodal Officer NLUP Mamit District in lawmthu a sawi a ni.

He inkhawm-ah hian Mamit khawpuia Heads of Offices, khawtlang hruaitute, sawrkar hnathawkte leh kuthnathawktute mithahnem tak an tel a ni