NLUP hnuaia bawnglian vulh thlangtute hnena pek tur Bawnglian chi Ludhiana, Haryana leh Karnel, Punjab atanga Mizoram Sorkarin a chah chuan zanin hian Mizoram an rawn lut tan dawn ta.

Tum khatna atan Ludhiana leh Karnel atanga hian truck trip 3 ve ve, avaiin bawng 60 (Sawmruk) chuan zanin hian Mizoram a rawn thleng tura beisei a ni a, hei hi Quarantine Set (ran natna laka venhim nan a dah hranna) Thingdawla siamah dah an ni ang a, AH&Vety Doctor engemawzatin hei hi an vil phawt ang. An eitur pawh AH&Vety Feed Plant, Ramrikawn, Aizawl atangin pek an ni dawn.

Tun tum bawng lokal hi Vety Field Assistant 6 (Paruk) in kawngah an rawn enkawl chhova, an awmna an chhuahsan hma in FMD venna pek vek an ni a, kalkawngah harsatna awmpalh pawhin Supplier ten Insurance an ti vek bawk. Bawng 60 (Sawmruk) dang chuan an awmna an rawn chhuahsan leh mek a, bawng 70 (Sawmsarih) dang pawh vawiin khan Punjab leh Haryana ah hian Truck-ah load tan leh mek a ni bawk.

NLUP bawng sem atanga vawiin thlenga report dawn danin, MULCO ringawtah bawnghnute litres 2600 ( Sanghnih leh zaruk) in a pung chho tawh a, bawnghnute tam tak avangin discount in bawnghnute pawh zawrh zeuh zeuh anih thu, Dr. Biakmawia, Director AH&Vety chuan a sawi a.

Bawnghnute pungchho zel hman tangkai anih theih nan, Chief Minister leh NLUP Apex Board Chairman ni bawk Pu Lal Thanhawla chuan Cheng nuai 350 (Zathum leh Sawmnga) Chhingchhip khua a Indigenous Milk Plant atan AH&Vety Department ah pek a lo remti tawh a, chu chuan thla 6 (Thlaruk) chhungin khawl bun fel a, bawnghnute atang eitur chi hrang hrang siam chhuah an beisei thu Director AH&Vety chuan a sawi bawk.