Vawiin chawhma dar 11:00 khan I & PR Auditorium ah District AH & Vety Office, Champhai District bultumin NLUP 1st Phase a Bawng Lian bik thlangtu tan training buatsaih a ni. He training hi Champhai DVO Dr.H. Laltlanmawia’n kaihruaiin bawnglian vulh dan leh enkawl dan hriat chian tawk loh avanga he inzirtirna hi buatsaih a nih thu a sawi.
Vawiin training hi Pu Zoengsanga, Addl. D.C leh NLUP District Nodal Officer chuan a hmanpui a, Mizoram Sawrkar Flagship programme NLUP kalpui mekah Champhai District chhunga Line department Nodal Officer te inpekna leh an thawhrimna chu fakawm a tih thu tarlangin Pu Zoengsanga chuan eizawnna nghet neih rura sawrkarin chhungkaw tinte hamthatna a pek chu rinawmna leh thawhrimna nen theihtawp chhuaha hlawhtlinpui turin a chah bakah Champhai District chhung mipuite mahni eizawnna kawnga intodelh tuma hma la tak tak mi an nih avangin he NLUP hamthatna an dawn pawh hi dinchhuah pui nana an hraan ngei a beisei thu a sawi bawk.
Bawng Lian chi vulh leh enkawl Training hi Champhai AH & Vety Department a Senior Veterinary Officer pahnih Dr K. Lalnithanga leh Dr. Lalsawithuama ten hamthatna dawngtu chhungkaw 111 hnenah Management of Dairy Cattle leh Treatment of Diseases in Dairy Cattle tih thupui hmanga chipchiar taka zirtirna an pek bakah kalkhawmte atanga zawhna te chhang in hun hman zui a ni.
Champhai District ah hian NLUP 1st Phase Bawng lian thlangtu chhungkua 111 awmin Bawng lian 222 pek an ni a, heng zingah hian bawng lian 5 chu a thih thu tarlan a niin a dangte erawh an hriselna a that thu dawn a ni a, heng hamthatna dawngtute atanga bawnghnute sawrchhuah zat hi chhutchhuah mek a ni.
Champhai District chhunga NLUP Bawng lian Cluster hrang hranga hamthatna dawngtu chhungkua chu hetiang hi a ni:-
1. Champhai North -33
2. East Tuipui -11
3. Lengteng -5
4. Tuichang -10
5. Champhai South -52
Total Beneficiaries -111 families.
