Vawiin chawhnu dar 1.00 khan State Election Commissioner Pu C. Ropianga hovin a pisa-ah 17th April, 2013 a Chakma Autonomous District Council inthlanpui neih tura inbuatsaihna thlirho a ni. Pu C. Ropianga chuan CADC inthlan neih tura inbuatsaihna chu peihfel thawkhat a ni tawh a; inbiakpawhna leh power supply a that chuan tluang taka inthlan chu neih theih a nih a beisei thu a sawi. Chawngte leh a chheh vela BSNL landline te, mobile service leh WLL te chu rintlak zawka siam dan tur sawiho a ni . Chawngte-a BSNL khawl tihnunna atana power supply khaihlak changa hman tur diesel thahnem tak chhawp a ni ang. MPRO lam pawhin 15th April, 2013 atangin polling station zawng zawngah wireless hmanga inbiakpawhna bun fel tumin ni 12th April, 2013 atangin beihpui an thlak dawn a ni. Power & Electricity Department pawhin 11 KV line hmanga Chawngte leh a chheh vela power an pekna chu mumal lehzuala kalpui turin tan an la mek bawk tih meeting-ah hian report a ni.

He meeting-ah hian BSNL aiawhin Pu A. Agarwal, Dy. General Manager te, P&E Dept. aiawhin Pu Vanlalauva te, MPRO aiawhin Pu Zohmingliana Addl. SP te, Pu Robert Thangmawia, Media Officer for CADC Election te bakah SEC Secretary Pu H. Darzika, Deputy Secretary Pu H. Lianzela te an tel a ni.