Border Security Force (BSF) hotulu ber Pu Subhash Joshi, IPS leh a nupui Pi Sudha Joshi te chuan vawiin khan Mizoram an lo thleng a. Nikum December 2012 atanga BSF hotulu ber nihna Director General hna chelh tan Pu Subhash Joshi hian ramchhung BSF Headquarters leh Border Outposts hrang hrang te tlawhin a zinkual mek a ni.

BSF DG Pu Subhash Joshi te nupa hi Mizoram BSF DIG Pu U.M. Subramani hovin BSF officials engemawzatin an hmuak a. Pu Joshi hi BSF thlawhna-in 57 Bn. awmna Jaralchuri leh 42 Bn. awmna South Phuldungsei-a BSF Outpost te a tlawh nghal a, hemi zawhah hian Tuirial BSF hmunah Sainik Sammelan neihpuiin BSF officer leh sipai zawng zawngte nen Barakhana an kil ho a ni. DG Pu Joshi hian kumin 2013 hi ‘Year of the Jawan’ (Sipaite Kum) ah a puang a, hei hian thui takin BSF hnuaiah sipai zawng zawng leh an chhungkuate tan hamthatna engemawzat a siam thei dawn a ni, a ti. BSF sipai leh an chhungte tan welfare scheme thar ruahman zel a nih thu sawiin an duty-na hmuna theihtawp chhuah zel turin a fuih a ni.

DG nupui Pi Sudha Joshi pawhin BSF Headquarters, Durtlang tlawhin BSF Wives Welfare Association te nen inkawmna hun a hmang a. BSF lamin Mizo hnam lam leh ennawm dangte buatsaih sakin Cultural programme an hmanpui a ni.

DG Pu Subhash Joshi hian Mizoram Chief Minister Pu Lal Thanhawla chu a chenna inah lengin state chhunga BSF hnathawh leh hmalakna hrang hrang chungchang a sawipui a. DG hi Addl. DG(East) Pu R.K.Punoth, IG BSF M&C Frontier Pu A.C. Thapliyal leh New Delhi atanga amah rawn zuitu senior officers engemawzatin an tawiawm a ni.

BSF Director General te nupa hi vawiin chawhnu vek khan Aizawl chhuahsanin New Delhi lamah an let nghal a ni.