Vawiin chawhnu dar 1:00pm khan NLUP Conference Hall-ah NLUP Marketing Cell Member Pu Andrew Lalherliana, Ex-MLA chu Member , MPSC ah ruat anih tak avangin a thawhpui NLUP Implementing Board (NIB) leh Marketing Cell Member leh Official ten lawmpuina leh thlahna hun an hmang.

Pu PL Thanga, Vice Chairman, NIB chuan “Pu Andrewa chu harsatna hunah pawh beidawng lova, rilru leh tih takzet na nen, NLUP hmanga rethei leh kuthnathawktute khai chhuahna atan beitu a ni”, a ti.

Member dangte pawhin MPSC Member nihna hna zahawm leh mipuiin dikna kalpui tura an beisei hmun luah thei a, an thawhpui dah a ni chu lawmawm an tih thu sawiin, MPSC chu hmingtha taka a kal chhoh theihnan dikna tan tlat turin Pu Andrewa chu an chah.

Pu Andrewa chuan, NLUP ah mirethei leh kuthnathawktute khai chhuahnan a hnathawh chu rawngbawlna pawimawh ber zingah a dah thin thu leh thawh zel a la chak thu sawiin, Sorkarin hnasang leh zahawm tak an pek takah erawh a lawm thu sawiin, Mizoram tan MPSC ah rinawm tak leh thahnemngai takin thawh a tum thu a sawi bawk.