Mizoram sorkar programme pawimawh tak New Land Use Policy (NLUP) beihpui thlak dan tur ruahmanna chu April ni 6, 2010 khan Cheif Minister Pu Lal Thanhawla hovin NLUP Apex Board chuan a siam fel tawh a. Khaw 813-ah Village Level NLUP Committee leh a viltu tur Monitoring Commitee din fel a ni a, District tinah District Level NLUP Committee siam fel a ni tawh bawk. October 2009 khan YMA hmangin Base LIne Survey zawh fel a ni tawh a, Mizorama chhungkua 2,07,971 zingah chhungkua 1,20,000 te chu NLUP guideline dungzuiin tanpuina hmu thei tura buaipui phawt tura ruahman a ni.

 

 

NLUP hnuaiah hian 60% chu ranvulh lam a nih avangin a hmasa ber atan NLUP (Vety. Sector) project bik chu kar kalta Zirtawpni khan A.H.&Vety. Farm Complex, Selesih-ah Home Minister Pu R.Lalzirliana in a hawng tawh a. He NLUP (Vety Sector)-in a tum ber chu ran vulh lamah eizawnna ngelnghet leh awlsam zawk siam bakah Mizoram chu bawnghnute, sa leh artui-a intodelh tir a ni. AH&Vety. Department-a thawktu doctor leh staff te chu NLUP (Vety Sector) ruahmanna chungchang chipchiar takin hrilhfiah an ni a, NLUP (Vety Sector) hnuaia tanpuina dawng tur zawng zawngte chu an hrilhfiah chhawng leh dawn a ni. Mizoram sorkar chuan theihtawp chhuah zelin NLUP hlawhtlin tir ngei a tum avangin hmanhmawh lova, mipuiten chiang taka he Programme-in a tum ber - ram intodelhna leh mipuite tan eizawnna ngelnghet siam sak - an hriatthiam hunah, fimkhur tak leh tih takzetna nena NLUP tanpuina sum an dawn an hman thiam theih nan beihpui thlak tan a ni ta a ni.

AH&Vety. department atanga thu dawn danin Mizoram puma sa mamawh hi kumtin cheng vaibelchhe 180 man hu vel a ni a, Aizawl khawpui ringawt pawhin kum khat chhunga sa eiral zat chu cheng vailechhe 61 hu a ni. Intodelh tur ringawta artui mamawh belh chu artui nuai 1200 a ni a, tunah hian kartin truck trip 3 vel Andhra Pradesh leh Delhi atangin a lo lut reng a ni. Mizoram pumah kartin bawng 250-300 talh ziah ang a ni a, vawk 400-500 talh ziah ang a ni bawk. Bawng man atanga kumtina luang chhuak chu cheng vaibelchhe 32 vela chhut chhuah a ni. India ram pumah Animal Husbandry hian ramchhunga thil dehchhuah zawng zawng (GDP)-ah za zela 32% a hawlh phak a, Mizoramah erawh chuan 17% chauh a la ni. AH&Vety. Director Dr.L.B.Sailo chuan Mizoramah Animal Husbandry hlawhtlinna tura thil pawimawh ber chu ‘Breeding Policy’ a ni tih sawiin he lamah pawh hmalak vat a nih a beisei thu a sawi bawk.

 

NLUP (Vety Sector) Project hawnna inkhawmah Pu P.L.Thanga, IAS (Rtd.), Vice-Chairman, NLUP Implementing Board leh Member-Secretary, Mizoram State Planning Board chuan chipchiar takin he Programme kalpui dan tur AH&Vety. department doctor leh official te a hrilhfiah a. NLUP Programme hlawhtling tur chuan mipuiten tanpuina sum an dawn tur ringawt dah pawimawh hmasa lovin he Programme chiang taka zira, kalpui tum a nih dan hrethiam a, rinawmna leh tih takzetna rilru an put a ngai zawk a ni, a ti. NLUP chu policy felfai tak duan sa ringa kalpui tur a nih avangin sorkar officials leh a kaihhnawih sorkar hnathawk dang zawng zawngte pawhin policy an hriat chian a ngai a, a nih loh chuan mimal induhsakna a piang thei a ni, a ti bawk. Pu P.L.Thanga chuan NLUP hlawhtlinna tur chuan hriatna, technology leh hmasawnna kalkawp a tul a, hei hian Mizoram sum leh pai dinhmun a siam that theih a beisei thu a sawilang bawk.