Vawiin khan NLUP Implementing Board(NIB) chu NIB Vice Chairman Pu P.L.Thanga hovin NIB conference Hall-ah an thu khawm a. Khuarel chhiatna avanga NLUP beneficiary vanduaina tawk te chhawmdawlna tura ruahmanna siam dan tur leh beneficiary thi te tan Life Insurance tihsakna tur te an sawi ho a ni. Beneficiary vanduaina tawkte khai chhuah lehna tura rawtna hrang hrang te sawiho hnu in chipchiar zawka ruahmanna duan a, uluk taka en ho leh turin rel a ni.

He meeting ah hian NLUP Media Cell hnathawh leh hmalakna te thlir ho a ni a. NIB leh DDK Aizawl ten kar tin Zirtawp zan dar 7:00pm - 8:00pm inkara Mizoram Hmasawnna Lamtluang an tih chhuah thin chu sorkar leh mipui inkara inhriat pawh tawnna tangkai tak a ni, tiin he programme hi changtlung zawka kalpui chho zel turin Media Cell chu thawktu leh hmanrua a thuam that zel NIB chuan a rel a. Mizoram sorkar leh UNDP, FAO, ILO leh IFAD te nena hma lak hona hnuaiah hmasawnna thar awm mek te ngaihthlak a ni bawk.