India hmarchhak Jet Airways hotuten tukin zing khan Chief Minister Pu Lal Thanhawla chu a chenna bungalowah an hmu a, Aizawl leh Delhi inkara thlawhna thlawh tir tum chungchang sawipuiin, amah ngeiin thlawk hmasa ber tur chu vailiam tur leh thlawk ve ngei turin an sawm a. Amaherawhchu Assembly session lai anih dawn avangin a hman loh tur thu Chief Minister hian a hrilh a ni.

Jet Airways hotute chuan Lengpui Airport tih changtlun nise tia rawtna an neih chu Chief Minister chuan sorkarin a phak tawk ang zelin hmalak anih tur thu a sawi a. Chief minister chuan thlawhna chuan man to lutuk a ngaihmawh thu Jet Airways hotute chu hrilhin, anni chuan an tum anga seat tam zawk siam belh anih theih chuan a chuan man chu a tlawm phah ngei ang tih chief Minister chu an hrilh a. Aizawl leh Delhi inkar hi ni 27 March 2016 khian thlawh tan tir an tum thu Chief Minister hi an hrilh bawk a ni.

Jet Airways hi service carrier puitling niin, Premiere (Business Class) Class leh bungrua phur thei a ni a. Hemi bakah damlo tan damlo zawnna hlang, ‘stretcher’an pe thei bawk a,hemi hmang tangkai duh chuan darkar 48 hma a an hotute hriattir hmasak angai dawn thung a ni.

Aizawl leh Delhi inkar thlawh hun tur chu hetiang hi a ni :

Delhi – Aizawl (Via Guwahati – 35mins halt ) Flight No.9W 7067 1000 hrs

Departure Delhi 1355 hrs Arrival Aizawl

Aizawl – Delhi (Via Guwahati – 35mins halt) Flight No.9W 7068 1425 hrs

Departure Aizawl 1840 hrs Arrival Delhi

Heng bakah hian Jet Airways ah hian Guwahati atangin Bagalore a kal theih a, Delhi atang hian Pune, Hyderabad leh Chennai te a kal theih bawk a ni.