Vawiin khan Mizoram State Sports Council (MSSC) buatsaihin National Level North East Games vawi 29-naa Mizoram aiawha medal la-te lawmpuina hun Khatla YMA Hall-ah neih a ni a. Sports and Youth Services Minister Pu Zodintluanga leh Parliamentary Secretary Pu Hmingdailova Khiangte chuan he hun hi an hmanpui a. Sports and Youth Services Department hotute leh MSSC hruaitute bakah Sports discipline hrang hrang association hruaitute pawh an tel kim hle a ni.

Khuallian, Sports and Youth Services Minister Pu Zodintluanga chuan lawmpuina sem inkhawmtawiah thu sawiin infiammite’n tha leh zung senga Mizoram tan hmingthatna an hlawh thin chu fakawm a tih thu a sawi a. Mizoramin sport lama hma a lak tan tak tak na chu ala reilo hle chungin infiammite thawhrimna leh inpekna zarah Mizoram chu infiamna lama India rama state zawng zawng zinga hmasawn chak ber a ni, a ti a.  Khuallian chuan infiammite chu Sawrkarin training-na tur a buatsaihte hmang tangkai leh zual tur leh North East mai bakah, India ram leh khawvel pum huap inelnaahte lawmman la thei tura tan la zual turin a fuih a, thla hnih khat lek camp neiha inghat lova, engtik hunah pawh inelna engpawh hmachhawn thei tura inbuatsaih reng turin a chah bawk. Mizoram sawrkar chuan Mizo nula leh tlangvalte theihna a hrechianga, nasa takin hma a lam mek tih a sawi bakah sawrkarin Sport lama hmasawnna tura hma a lakna hrang hrangte a tarlang bawk a ni.

National Level North East Games vawi 29-naa Mizoram aiawha medal la-te lawmpuina hun hi MSSC Secretary Pu C. Laltlanthanga’n a kaihruai a. He North East Games vawi 29-naa Mizoram teamte kaihruaitu, Chef-De-Mission, Pu H. Thangchungnunga, MSSC-a Sports Promotion Officer ni bawk chuan Mizoram team-te inbuatsaih dan leh Games neih zawh taka Mizoram aiawha kalte dinhmun tlangpui a tarlang bawk.

National Level North East Games hi sawrkar laipuia Ministry of Youth Affairs and Sports scheme pakhat,  Rajiv Gandhi Khel Abhiyan (RGKA) hnuaia buatsaih a ni a. North East Games 2016 hi National Sports Academy (NSA) Imphal-in a thlengin March ni 2-7, 2016 chhung khan Khuman Lampak Stadium-ah North East state pariat atanga kalkhawm infiammi 920 leh official 100-ten inelna discipline pariat, Athletics, Badminton, Boxing, Football, Hockey, Judo, Table Tennis leh Weightlifting-ah te neih a ni. Manipur-in a pumpuiah point 310 hmuin an champion a, Point 164 hmutu Mizoram chuan a dawt a ni. Mizoram team-te hian Gold Medal 17, Silver Medal 19 leh Bronze Medal 12 an la a ni.

Mizoram aiawha medal la zawng zawngte hnenah hian MSSC chuan lawmpuina thilpek a hlan vek a ni.

North East Games 2016-a State hrang hrangte dinhmun

 North East Games 2016-a Mizoram Team-te Medal lak dan: