Champhai District chhunga NLUP, Fisheries Beneficiaries te hnenah vawiin chawhma dar 11:00 khan 3rd. Installment sem a ni.

NLUP semna inkhawm, CHANEM-a I&PR Auditorium a neih hi District Fisheries & Development Officer (DFDO) Pu B.D.Tyagi-an a kaihruai a, NLUP tanpuina dawngtu kalkhawmte hnenah Sangha Dil siam dan tha, Sangha enkawl dan leh a chaw pek dan te beneficiaries kalkhawmte hnenah DFDO Staff ten Training an pe nghal a ni.

Champhai District-a Fisheries beneficiaries te hnenah tun tum hi tanpuina an pek vawi 3-na (3rd. Installment) a ni a, 1st leh 2nd Installment ah Rs. 56,000 pek an ni tawh a, tun tumah hian Sangha Chaw, Chinai Thi, MOP leh Pawisa fai, a vaiin Rs. 17,650/- hu sem a ni a, heti hian NLUP Beneficiearies te hnena tanpuina sem tawh zat chu a vaiin Rs. 73,650/- a ni tawh a ni. Hei bakah hian Beneficiaries te hnenah Sangha chi sem tur chu tun thla tawp lam hian Champhai-ah a rawn thlen leh beisei a ni. DF&DO Pu B.D.Tyagi chuan tuna tanpuina sem bak, tanpuina sem tur la awm chu a pawisa fai ni lovin, a hmanrua/bungrua a sem a nih tawh tur thu a sawi.

Champhai District ah hian NLUP Fisheries Beneficiaries 148 an awm a, vawiin a NLUP semna inkhawmah hian chawhma lamah Champhai District AMFU President Pu H.Taithuama leh Kahrawt VCP Pu F.Lalrinnunga ten thu an sawi a, chawhnu lamah Training hi neih a ni a, NLUP Beneficiaries te an kal tha hle.