Sorkar laipuia Ministry of Women & Child Development-in ICDS kaltlanga hmeichhe tleirawlte kawng tinrenga hmasawnna tur ngaihtuaha a duan programme thar ‘Rajiv Gandhi Scheme for Empowerment of Adoloscent Girls’ (SABLA) chu Mizoram-a District pathum - Aizawl, Lunglei leh Saiha - ah kalpui tan a ni a. Vawiin khan Social Welfare Department buatsaihin Venghlui Central Hall-ah he scheme hnuaia Peer Leaders Training neih a ni a, mithiam rualten tleirawl kaihruaitu tura thlanchhuah te an zirtir a ni.
CDPO, Urban ICDS Pi Zoramthangi Chhangte kaihhruai he Peer Leaders Training-ah hian ‘Taksa rih zawng leh san zawng inphu dan’, Mahni taksa inhriatchian’, ‘Mipa hmeichhiatna leh HIV/AIDS’, ‘Tunge ka nih? Mahni inhriat’ leh ‘Decision Making & Leadership Qualities’ tih thupui hmangin training pek a ni.
He scheme hnuaiah hian hmeichhe tleirawl ten Anganwadi Centre atangin chawtha bakah thisen tlakchham (anaemia) ven nan Iron & Folic Acid damdawi te an dawng ang a. Zirtirna tha hriselna lam te, chawtha chungchang te, inchhungkhur enkawl dan te, mahni inrintawkna neia khawvel hmachhawn tura buatsaihna te an dawng bawk ang. Sikul bansan tawh ten beidawng taka hun hmang mai lovin thiamthil te an neiha eizawn tlaka an hman theih nana training pek chu he scheme hian a tum bawk a ni.
Hmeichhe tleirawl kum 11-18, sikul kal mek leh kal lo, te he scheme hian a huam vek ang a. Heng tleirawl te hi Group-ah thenin an hotu (Peer Leader) te thlanchhuah a, chung Leader (Sakhi & Saheli) te chuan an thiante an zirtir ve chhawng dawn a ni. Aizawl khawpui chhungah Aizawl Urban ICDS Project hnuaiah tunah hian hmeichhe tleirawl 11,591 he scheme hnuaiah hian ziahluh an ni tawh a ni.
