Vawiin chawhma dar 11 atang khan Vanapa Hall, Aizawl ah Leadership Training on NLUP neih a ni a, hetah hian Pu Lal Thanhawla, Chief Minister chu khuallian niin Pu R. Selthuama, NLUP Implementing Board (NIB) Chairman chuan a kaihruai a ni.

Kalkhawm mipui thahnem tak hmaah thu sawiin Pu lal Thanhawla chuan, “NLUP hi sorkar flagship programme anih angin, Mizoram mipuite ta a ni a, congress party ta emaw kan tih chuan kan ti dik lo ang tih hi party hrang hrang mite leh mipuiin an hriat ka duh” tiin a hlawhtlin nan tan ho theuh a pawimawh thu a sawi.

Pu Hawla chuan, NLUP hmasa ah sorkar in inbuatsaihna tha nei lovin, mipui NLUP tanpuina dawngtute hrilhfiahna leh zirtirna an neih tawk loh avangin duh angin a hlawhtling tawk lova, tuntumah hi chuan ruahmanna fel zawk nei thei turin kum 2 chhung inbuatsaihna kalpui anih avangin hlawhtling hle turah a ngaih thu a tarlang bawk. Kohhran te, NGO te leh AMFU hotuten NLUP an tuipui na ah lawmthu sawiin, an hmalakna ah tih takzet a Mizoram kuthnathawk tute khaichhuah duhtu an tam chu lawmawm a tih thu a sawi.

Vanduaina tawh avanga Bawng leh thildang chante chu enfiah an ni a, chhawmdawl leh an ni dawn tih Chief Minister chuan a sawi a, hlemhletna avanga ti riralte erawh pek nawn an nih loh tur thu a sawi bawk.

Land Reforms chungchang a sawi na ah Pu Hawla chuan, hemi atan hian department ten an peih tawh thu, Law lam thiamte, Kohhran hruaitute leh mithiam dangte entirin a that dan bera tih chhuah tum anih thu a sawi.

NLUP kum 5 atanga programme siam a zawh hnu ah, Exit Protocol (kut hnathawktute in enkawl zuina tur leh enkawl belh ngaite tan) atan sorkar hotuten hma an lak thu Pu Hawla chuan a sawi.

Pu R. Selthuama, NIB Chairman chuan Synod Social Front ten NLUP hmalakna an survey ah khaw engemaw zatah nasa takin hlawhtlinna a awm tan ni a an tarlan chu lawmawm a tih thu sawiin, dikna leh rinawmna nen NLUP chu Hreipui Khuaituthei anih angin dawn mai bakah mahnin kan thawh ve tur ti theuh turin mipui a chah a ni.

Pu P.L. Thanga, NIB Vice Chairman chuan kum 2008 atanga Mizoram sorkar hmasawnna neih hrang hrangte leh NLUP hmalak dan hrang hrang power point presentation hmangin a nei a ni.

He inkhawmah hian thu sawitu hrang hrang an awm a, Pu Zion Remruata, General Secretary AMFU chuan, Kut hnathawktuten a taka sum an mahni a thleng ta chu lawmawm a tiin kut hnathawktute hmangaihtu Chief Minister an nei chu lawmawm a tih thu a sawi a. Pu R. Ramhmangaiha, President, Hnam Chhantu chuan, NLUP hian Pathian leh zawlneiten min lo hrilh, retheite tana malsawmna ruai tlahniam a ni, tiin, “Lalpan ruai a chawikan leh hma hian i kil thuai thuai ang u” a ti a ni.

Pu Robert S. Halliday, Co-ordinator, Synod Social Front chuan, Synod hian ei leh bara intodelh hi a lo kalpui mek a, NLUP programme chu tih tak zeta hlawhtin theih nan an lo thlir ve thin anih thu leh survey hian an lo neih dan a sawi.

Salvation Army Chief Secretary Col. Ramhluna chuan hunserh hmangin, NLUP chu ramthar dinna hnukpui, kawng leh thutak leh nunna chu a ni a ti.

Pu H. Liansailova, Nodal Minister of NLUP chuan kharna hun neiin lawmthu a sawi a ni.