Laki khua a nghah 25th MSO General Conference nithum awh tur ( 24 - 27, October, 2012) chu Pu S.Hiato, Minister chuan khuallian niin a hman pui.

He Conference-ah hian Minister Pu S.Hiato chuan MSO (Mara Students’ Organisation) chu 20th April,1965 a shillong a din a ni thu sawiin, an din dan leh President hmasa ber a nih thu te sawiin, a din tirh lai ngaituahin, tuna MSO len tawh zia te leh Mara zirlai tam tawhzia te hi Pathian kaihruaina vek a ni a, tun dinhmun kan thleng thei hi ka lawm tak zet a ni, a ti.

25th MSO General Conference thupuia “Zirna Dik” an hman chu zirlai pawl thupui atan inhmeh a tih thu a sawiin, Zirna dik chuan zirlaite chu khua leh tui tha, ram leh khawtlang tana mi chhenfakawm leh chhungkaw tana innghahna tlak mihringa a siam thin a ni, a ti a. Zirlaite chu hmasawn zel tur leh ram leh hnam innghahna lungphum leh ram nghahfak, naktuk lawk a kan ram hruaitu tur an nih hre reng a, in nghahna tlak, thiamna tak tak nei, mi dik leh rinawm, ram hmelma ni lova ram tana malsawmna thlentu ni theuh turin leh khawvel hmasawnna mil an sukthlek leh hmathlir siamrem thiam a turin a chah a. Zirlai kalkawmte chu taihmakna, rinawmna leh huaisenna a inthuam, a India ram pawn lam thlenga hna zawnga feh chhuak ngam tur in a chah bawk.

Sawi zelin Minister chuan India sawrkar leh tun Mizoram sawrkarin hnam tenau zawkte a hmangaih a, hmasawnna hna tam tak a thawhsak a, chhimlam chu Mizoram kawtchhuah leh sumdawnna hmunpui a nih thuai tur thu a sawi. Zirlai kalkawmte chu ram hmsawnna ruala ke pen ve thei tura an inpuahchah nasat a tul a ni, a ti . He hunah hian Minister Pu S.Hiato chuan General Conference Silver Jubilee lungphun hawngin, MSO Gen.Hqrs buatsaih “ Vyphao Magazine” a tlangzarh nghal bawk.

Conference hman zawh hian Palak bial khaw hrang hrang Khopai, Ahmypi, Zawngling, Tuipang, Theiri leh Theiva te tlawh nghalin, mipuite chu sawrkar hmalakna tawiawm tha a, kutdawh rilru paih a, mahni intodelh tum ngei turin a chah.