October thla hi khawvel hmun tina Hnute cancer chungchang inzitirna leh inhrilhhriatna thla, Breast Cancer Awareness Month a hman thin a ni a, Mizoramah pawh a vawi khatna hmang mekin, vawiin khan a kharna hun High School Field, Zarkawt-ah hman a ni a, Chief Minister Pu Lal Thanhawla chu khuallian a ni.

Chief Minister chuan hnute cancer chungchang inhrilhhriat leh inzirtirna hun a buatsaihtute thahnemngaihna avanga huaihawt a ni chu a ropui hle a ni a ti a. Mizoram hmun zau zawkah neih thin nise a duhawm hle a ni a ti. Chief Minister chuan cancer natna hi hlauh nachang kan hriat a tul a ni tiin, khawvela cancer tamna ber kan ni hi a chhuanawm loh hle a ni a ti a. Kristian state ni si, hrisel ber awm tak, hrisello ber kan nihna hian Lal Isua kan timualpho hle a ni a ti. Hetiang dinhmuna awm kan nih avangin kan nun kan uluka, ei leh inah insuma, fimkhur tur leh, zuk leh hmuama kan fihlim a tul a ni a ti. Hmasawn tur kan nih angin kan hriselna kan ngaipawimawh tur a ni a ti.

Cancer avanga sorkarin sum tam tak a sen thu Chief Minister chuan a sawi bawk a. Tunah hian state pawna kal kher ngai tawhlo turin kan ramah ngei Cancer Hospital pawh din mek a ni a ti a. Ram changkangah chuan cancer laka dam chhuak tam tak an awm a ni tiin, hriat chhuah hma a pawimawh rualin cancer chungchang kan hriat tama, awareness kan siam tam a tul a ni a ti.

Mizoram State Cancer Control Society Program Assistant Dr.Jeremy L.Pautu chuan India ramah kumtin hnute cancer 1,50,000 vel hmuhchhuah a ni a ti a. Ram changkang USA leh Europe ah hnute cancer thihpui 20% leh 27% an awm laiin, India ah chuan 48% a nih thu a sawi a. Hei hi cancer hmuh chhuah har vang a ni ber a ni a ti. Mizoram ngeiah cancer natna enkawl theih anih thu a sawi bawk.

Breast Cancer Awareness Programme denchhen hian hnam lam intihsiakna, Sarlamkai, Chai leh Cheraw ah te Art & Culture Departmenta inziaklut Clubte tan buatsaih a ni bawk a. Club 6 tel zingah, Vaivakawn Club chu ti tha berin Rs.20,000/- an dawng a. Club dang zawngin participation award Rs.3,000/- theuh an dawng bawk a ni.

He Programme buatsaihtute hi Mizoram State Cancer Control Society, Mizoram Cancer Care Foundation leh Cancer Society of Mizoram te an ni a. Inkhawm hi Dr. K. Lalbiakzuala’n a kaihruai a ni.