“NLUP hi Sekibuhchhuak ni lovin Hreipui Khuaituthei a ni a, tha a ngai” tiin NLUP Implementing Board (NIB) Chairman Pu R.Selthuama chuan vawiin khan Aizawl South I bial tana NLUP 2nd installment semna, Venghlui Central Hall-ah a sawi.

Industries department hnuaia NLUP 2nd installment sem ah hian veng 7 atangin chhungkaw 393 - Upper Republic-ah chhungkaw 50, Republic-ah 62, College Veng-ah 49, Bethlehem-ah 26, Bethlehem Vengthlang-ah 91, Republic Vengthlang-ah 43 leh Venghlui-ah 72 hnenah a vaiin tanpuina sum Rs.208,07,600/- sem a ni a. Hemi zinga Desktop Publishing thlangtu chhungkaw 12 te chuan a hlawmin nuai 1 an dawng nghal a ni.

Pu Sela chuan NLUP thil tum lian ber chu retheihna lak ata kut hnathawktute chhanchhuah a ni a. Chhungkaw tam takin bul tanna tur sum an neih loh vanga retheihna bawiha an tan laiin anmahni chhan chhuah nan sorkar-in eizawnna bul tan na tur sum nuai khat lai a thlawna a pe chu lawmna chang an hre tur a ni, tiin tanpuina dawngtute chuan NLUP thil tum tih hlawhtlin chu an mawhphurhna a ni, a ti a. A ti hlawhtling tur erawh chuan rinawmna leh taimakna nen tha tam tak sen a ngai a ni, a ti bawk a. Mizoram sorkar-in tun hma a NLUP a lo kalpui tawh ah mi hlawhtling te leh hlawh chham te chanchin sawiin Pu Sela chuan heng atang hian tuna NLUP dawngtute hian entawn tur chi 2 an nei a ni, a ti a. NLUP sawi chhetu ten he project hi sawi hnawmin sum sem tur awm tawh lo ang ten thu thang diklo thehdarh thin mah se, Mizoram sorkar chuan NLUP hi a kalpui zel dawn a, sum ah harsatna a awm dawn lo, a ti bawk.

NLUP 2nd installment semna hun hi Pu J.Hmingthanmawia, Addl.D.C chuan a kaihruai a. Pu John Saikhuma, General Manager, DIC, Aizawl chuan technical report pe in Lt.Col.Z.S.Zuala, Aizawl District Monitoring Committee Chairman pawhin NLUP dawngtute fuihna thu a sawi a. Pu Zorammuana, Secretary NIB in lawmthu swiin hun hnung a khar a ni.

Vawiinah vek khan Industries department hnuaia 2nd installment hi Aizawl West I bial ah pawh sem a ni a. Veng 5, Sairang Dinthar, Phunchawng, Sihhmui, Siarang leh Rangvamual atangin chhungkaw 87 hnenah a vaiin Rs.43,53,200/- sem a ni.