Ramri hrula khuate tihchangkanna tur ngaihtuahin vawiin khan State Level Screening Committee(SLSC) on Border Area Development Programme (BADP) chu Pu Vanhela Pachuau, Chief Secretary leh Chairman SLSC on BADP ni bawk hovin sawrkar mipawimawhte Chief Secretary Conference Hall, New Secretariat Complex-ah an thukhawm.

Kum 2011-2012 chhunga sorkar laipui Ministry of Home Affairs (Deptt. of Border Management)-in ramri tihmasawnna atana cheng nuai 3702 Mizoram sawrkar hnena a pek chu he meeting ah hian an thlirlet a. Additional Allocation cheng nuai 137.73 chu sorkar kum tawp dawn hnaiah chauh sorkar laipui atanga hmuh a nih avangin kumin sorkar kum kal meka hman turin dah a ni. Sorkar kum kal mek 2012-2013 atan hian BADP kaltlangin sorkar laipui chuan Mizoram tan cheng nuai 4017 a dah a, Additional Allocation cheng nuai 137.73 nen chuan a vaiin cheng nuai 4154.73 kumin kum kal mekah hman tur a awm a ni. Rural Development (RD) Block sawmparuk (16) ten he sum an hman tangkai dan tur Annual Action Plan chu uluk leh chipchiar taka enho a ni a, a kaihhnawih BDO ten anmahni bial chhunga an hmalak dan tur uluk zawkin lo zirchiang leh sela, kar khat chhungin RD Director hovin thlir nawn leh phawt ni se tia thu dah a ni.

Meeting kaihruaitu Pu Vanhela Pachuau chuan tunlai khawvelah India sumpai endik tu ber CAG Report hi ngaihpawimawh a nih dan a tarlang a. Sorkara thuneitu lian leh Politician ropui ber ber te pawh CAG report avangin hmingchhiatna an lo tawk fo tawh a, chuvangin BADP sum hman chungchangah pawh hian a mawhphurtute an fimkhur lehzual a tul thu leh uluk leh dik taka hmang turin a fuih hlawm a ni.