NLUP chungchanga High Level Meeting, naktip July 25 a Chief Minister hova neih tur atan line department te chuan vawiin khan Chief Secretary Pi L.Tochhong hovin Chief Secretary conference room ah an inbuatsaihna te an thlir ho.

Vawiin meeting ah hian NLUP hnuaia hmalakna thenkhat, beisei pha tawk lo te leh line department harsatna tawh te sawiho a ni a. AH&Vety hnuaia vawkte sem chhunzawm chungchang te, Fishery department hnuaia sangha chi indaih lohna te, Horticulture department leh Soil & Water Conservation department hnuaia thlai chi indaihlohna phuhrukna tur te, Environment & Forest hnuaia ramngaw humhalh kalpui dan tur leh Land Revenue & Settlement hnuaia awmze nei zawka ram leilung hman tangkaina tur chungchang ah te department hrang hrang te chuan NLUP hnuaia hma an lo lak tawh dan te sawiin harsatna sukiang tura ruahmanna thar an siam te chu thlir ho a ni a. Heng ruahmanna te hi siam that ngai lai te siam tha in naktipa High Level Meeting a rel turin chhawp chhuah a ni ang.