Mizoram Sorkar Flagship Programme hnuaia hmunphiah chingtute hmunphiah thar chhuah chu lei tura ruat Hnam Chhantu Pawl leh Mizoram Broom Industries Ltd. te chuan an lei mek zel.

Tunah hian Hnam Chhantute chuan an hmunphiah leisate chu anmahni Office Pu C.Pahlira Building-ah an chhek khawm a, kuminah hian Quintal 300 chuang an lei tawh a, Mizoram Broom Industries Ltd. te chuan Industrial Growth Centre, Luangmual-a sorkarin hmun a hmantirnaah an hmunphiah leite hi an chhek khawm a, kuminah quintal 500 vel an lei tawh tih an sawi.

Mizoram Broom Industries neitute zinga pakhat Pu Engthanga chuan hmunphiah quality a zirin a man pawh a insan hleih zel thu leh thenkhat chuan quality chhe lutuk deuh an supply avangin a man a tlawm a, hei hi ram pawnah chuan thawn chhuah tlak a nih loh thu sawiin, sorkar lamin hmunphiah chin leh seng dan bakah seng hnua sawngbawl dan training an neih that zui hle a ngai dawn tih a sawi.

Pu Ramhmangaiha, Hnam Chhantu hruaitu chuan Mizoram sorkarin mi retheite eizawnna siam awlsam tak hmunphiah chin an Flagship Programme NLUP-ah a telh chu lawmawm tak meuh atih thu a sawi a, kum 15 vel hmunphiah chungchangah hma an lo lak tawh thu leh a hralh chhuahnaah a buaithlak loh zia thu a sawi a ni.

Hnam chhantute hian an kudam (Godown) a khah tawh avangin sorkarin an remruat sakna NLUP Hmunphiah leina Seling 0 point-ah chauh hmunphiah an lei tawh tur thu an sawi a ni.