Primary zirtirtute hi a bulthuta zirlai naupangte zirtirna petu an nih avangin, Chief Minister Pu Lal Thanhawla chuan ’zirirtute zingah primary zirtirtute hi khawtlang nun siam thatna kawngah in pawimawh zual bik a ni’ a ti. He thu hi Mizoram Primary Teachers’ Association (MPTA) in Thupui, ‘Inpek Tharna’ tih hmanga Kum Puan Hawnna vawiina Vanapa hall-a an buatsaiha a sawi a ni.

Chief Minister chuan Primary Teachers Association in inpek tharna kumpuan hawnna an nei chu a ropui hle a ni a ti a. Mizorama kan mamawh ber chu khawtlang nun siam thatna -social reformation a ni tiin, hemi nei tur hian Lal Isua nun kan mamawh a ni a ti a. Zirtirtute chu khawvela thil harsa ber, mihringpuite hnena zirtirna pek, mihring file deal tu an nih avangin kawng engkimah tan lak ngai reng a ni a, inthlahthlam hman a nilo a ni a ti. Chuvangin mahni hna theuhah tui taka thawka, rinawmna leh Pathian tih chunga, taima taka thawk turin zirtirtute chu a chah a ni.

Chief Minister chuan sorkar hmasa khan kihhnawk nasa tak a neih avangin zirtirtu hlawh la theilo an awm phah fo a; he harsatna hi tih fel thawkhat anih tawh thu sawiin, kum thar atang chuan hlawh lak theih loh ang hi a awm tawh loh ka beisei a ni a ti. Education Reforms Commission Report pawh sum harsatna avanga hman mai theih loh chu, central sorkarin sum mamawh zat tur a pek theih a beisei mek thu a sawilang bawk a ni.

Mizo zirlaite hian thiamna tak tak kan zirchhuah ngei theihna turin, Continuous and Comprehensive Evaluation (CCE) kalpui mek chu zirtirtuten Inpek Tharna kumpuan an hawn ni atang hian a taka kalpui a, tan nasa leh zuala la turin zirtirtute chu a chah a. Zir chhuak tawh te tan Mizoram sorkarin eizawnna hna a pek sen dawn loh avangin, Mizoram pawn thlenga thawk ngam tura thiamna ziktluak zirchhuak ngei turin zirlai zawng zawngte chahin, zirtirtute pawhin an mawhphurhna hlenchhuak turin a fuih bawk a ni. Mahni ram pawna hna thawh chungchangah Kerela State chu an entawntlak hle a ni a ti.

Inpek Tharna kumpuan hawnna ah hian Pi Esther Lalruatkimi, Secretary, Education chu khualzahawm a ni a. CCE in zirtirute tan kaihhruaina chipchiar tak a siam dungzuiin, MPTA Gen Secretary Pu R.Zonunmawia’n inpektharna chhan tur point 10 a siamte a sawi bawk a. Inkhawm hi MPTA President Pu C.Biaknghinglova’n a kaihruai a ni.