Vawiin khan NLUP hmunphiah siamsa a hlawma thawnchhuahna hun hman a ni a, Delhi khawpui bul mai Ghaziabad-a hralh tur hmunphiah Truck Trip khat hi Home Minister Pu R Lalzirliana’n Ophel Motor House, Ngaizel atangin a vai liam.

Pu R Lalzirliana chuan Mizorama kuthnathawktu te tharchhuah ngei phairama thawnchhuah a ni ta hian NLUP hlawhtlinzia a tilang a, rim tak leh hah taka thawktuten a rah an seng tan ta chu lawmawm a tih thu a sawi. Hlawk zawk leh hlu zawka kut hnathawktute thar chhuah cheibawl nan kawlphetha a pawimawhzia hriaia sorkarin kawlphetha-a Mizoram a intodelh theih nan hma a lak mek dan a sawi a. Tui chakna hmanga kawlphetha siam chhuahna tur Tuivai HEP, MW 210 pechhuak thei tur pawh sorkar laipuiah a tihtur tul zawng zawng zovin, a thawktu tur Contractor thlanga, khuah mai theih tura buatsaih a ni, a ti. Retheihna umbona atan intodelh a tul a, intodelh tur chuan taimak a pawimawh a, huaisen tur pawhin intodelh a pawimawh a, sorkar laipui atanga tanpuina dil reng ngai lovin mahni intodelh tum turin Home Minister Pu R Lalzirliana chuan kalkhawm te a sawm a. He ramah hian eizawnna tur tam tak a awm a, a thawk peih leh taimte tan chuan hlawhtlinna tur kawng tam tak a awm a ni, a ti bawk.

Vawiin Hnam Chhantu Pawlin NLUP hmunphiah an thawn chhuah hi phiah 34,000 niin hmunphiah pakhat hi gram 300 zela rit a ni. Ip 340-ah thunin ip pakhat rih zawng hi kg 35 zel a ni. Mizoram hmun hrang hranga NLUP hnuaia hmunphiah chingtute hnen atangin Hnam Chhantu Pawl hian hmunphiah a leikhawm a, a siam hna hi Hmunphiah Kutpui, March thla-a Vanapa Hall-a neih tuma zir chhuak ten an thawk a, thawn chhuah tura tel hna hi Student Self Support Union ten an thawk a ni.

NLUP hmunphiah thawn chhuah inkhawm, Hnam Chhantu General Secretary Pu R Romawia kaihhruaiah hian an President Pu R Ramhmangaiha’n hmunphiah cheibawl sa thawnchhuak tura tan an lak dan tlangpui a sawi a. An pawl Vice President Pu C Lalthakima’n lawmthu sawiin hun hnung a khar a ni.